Governu Timor-Leste no Coreia do Sul Inaugura Sentru CBT
Governu Timor-Leste liuhusi Sekretáriu Estadu Polítika Formasaun Profisionál no Empregu, Ilídio Ximenes da Costa, hamutuk ho Embaixadór Coreia do Sul ba Timor-Leste, Oh Hyang Kyun, iha loron 6 Novembru 2013, inaugura sentru Computer Based Test (CBT) iha Becora, Dili.
Sistema CBT ne’e, mak sistema teste foun ba lian Coreia, ne’ebé muda husi Paper Based Test (PBT) ka sistema ne’ebé uza surat tahan, ba computer based test, ne’ebé halo teste uza komputadór.
Sistema teste foun ne’e, uza internet online ba pergunta no resposta, nune’e, kandidatu trabalhadór bá nasaun Coreia do Sul, bele tuir ezame lian Coreia ho sistema online.
Sekretáriu Estadu Polítika Formasaun Profisionál no Empregu, Ilídio Ximenes da Costa, lori Governu Timor-Leste nia naran, agradese ba Governu Coreia do Sul ne’ebé apoiu ona Timor-Leste iha área kapasitasaun rekursu umanu. “Liuhusi sentru CBT ida-ne’e, bele fó pasu ba Timor-Leste atu bele kapasita no hasa’e joven sira nia kapasidade iha área teknolojia. Ha’u sente orgullu ho teste lian Coreia nian liuhusi online. Foin ba dahuluk mak SEPFOPE hala’o sistema ne’e ba traballadór sira,” dehan Sekretáriu Estadu.
Embaixadór Coreia do Sul ba Timor-Leste, Oh Hyang Kyun, hakarak halo kolaborasaun di’ak ba oin, atu bele haruka servisu na’in barak liután ba Coreia do Sul. “Ezame liuhusi online, sai dalan ida atu servisu na’in sira bele tuir ezame ho di’ak liután,” Embaixadór Oh Hyang Kyung hateten.
Marka prezensa iha Seremónia ne’e, Sekretáriu Estadu Peskas, Rafael Pereira Gonçalves, Vise-Prezidente Coreia do Sul, Lee Chun Box no Diretór-Jerál SEPFOPE, Jacinto Barros Gusmão.
