Timor-Leste buka atu tulun nafatin Guiné-Bissau
“Governu Timor-Leste buka atu tulun nafatin Governu no povu Guiné-Bissau, atu rezolve problema ne’ebé mak ohin loron nasaun membru Comunidade Países de Língua Portuguesa (CPLP) ne’e hasoru. Deklarasaun ne’e hato’o husi Vise-Primeiru-Ministru Timor-Leste, Fernando La Sama de Araújo, bainhira halo sorumutu bilaterál ho Primeiru-Ministru Guiné-Bissau, Rui Duarte Barros, iha loron 4 fulan Novembru, iha Macau, Xina.
La Sama mak lidera delegasaun Timor-Leste nian iha Macau bainhira partisipa
iha Konferénsia Ministeriál ba Forum Kooperasaun Ekonómika no Komérsiu entre País sira Lian Oficiál Portugés, no Xina.
Vise-Primeiru-Ministru, La Sama, hateten, “Estadu no povu Timor-Leste iha sentimentu solidariedade, ne’ebé forte ba povu Guiné-Bissau. Timor-Leste iha esperiénsia luta hanesan. Estadu no Governu Timor-Leste buka nafatin maneira hodi fó tulun ba nasaun Guiné-Bissau”.
Primeiru-Ministru, Rui Duarte Barros, lori povu Guiné-Bissau nia naran agradese ba Estadu no povu Timor-Leste ba laran luak, hodi bele tulun rezolve problema ne’ebé akontese iha Guiné-Bissau durante ne’e. Governu Guiné-Bissau mós agradese ba apoiu husi Governu Timor-Leste, ba prosesu resensiamentu eleitorál hodi hasoru eleisaun jerál, ne’ebé tuir planu sei hala’o iha fulan Marsu 2014. Ruis Barros mós hein katak, kolaborasaun iha futuru, bele mós habelar liután iha área sira seluk, inklui iha área seguransa nian.
