Governu Timor-Leste

Sekretaria Estadu ba Promosaun Igualdade (SEPI) promove produtu lokál liuhosi lansamentu Feira FIAR (Feto Iha Auto-impregu Rasik) iha Sentru Konvensaun Díli, hahú iha loron 5-8 Novembru.

Feira ne’ebé loke ba públiku ho objetivu atu komemora Loron Nasionál ba feto, ho tema ‘’Hateten La’e ba Violénsia Doméstika Hamutuk Ita Servisu ba Dezenvolvimentu Nasionál."

Sekretária Estadu ba Promosaun Igualdade, Idelta Maria Rodrigues, iha nia diskursu hateten,  “hahú hosi IV Governu Konstitusionál, Sekretária Estadu ba Promosaun Igualdade servisu hamutuk ho Sekretaria Estadu Polítika Formasaun Profesionál no Empregu, Sekretaria Estadu ba Apoiu Promosaun Setór Privadu, hahú programa ida hanaran Feira FIAR, atu dedika no fó atensaun ba promosaun produtu saida de’it mak feto sira bele halo”.

“Ho atividade ne’e, ita hotu la haluha katak, feto sira la’ós servisu iha uma laran de’it, maibé  sira mós bele halo buat ruma hodi aumenta rendimentu ba ekonomia família nian. Involvimentu feto atu hadi’a família nia ekonomia, tuir Idelta, bele previne no hakribi violénsia doméstika iha uma laran”, Idelta hateten.

Aleinde feira FIAR, selebrasaun loron nasionál feto nian ba tinan ida-ne’e mós iha Konsertu muzikal hosi banda múzika Timor-oan sira nian hanesan: Dejukdil, Galaxy, Inferno, 5 de Oriente,  T-69, Cidalia, Ofelia, no Banda Muzika KOTAK husi Indonézia.

Partisipa mós iha abertura Feira ne’e, Vise Ministru Solidariedade Sosiál, Jacinto Rigoberto de Deus, ONG nasionál, Rede Feto no Grupu feto hamutuk 60 hosi distritu 13.