Ministériu Justisa sei identifika rai ba projetu auto-estrada
Ministériu Justisa liuhosi Diresaun Nasionál Terras no Propriedade no Servisu Kadastrál (DNTPSC), hala’o enkontru ho autoridade lokál sira, husi Sub Distritu Vemasse, Kuarta (23/10) no Sub-Distritu Baucau Vila iha loron Sesta, 25 Outubru 2013, hodi ko’alia kona-ba auto-estrada ne’ebé sei harii iha tinan 2014. Enkontru hanesan hala’o mós iha distritu Liquiça. Iha enkontru ne’e fasilita husi Asian Development Bank (ADB).
Diretór DNTPSC, Romão Guterres, husu ba komunidade no autoridade lokál sira, hodi bele haree didi’ak komunidade sira-nia rai ne’ebé mak kona auto-estrada ne’e.
“Bainhira auto-estrada liuhusi komunidade sira nia rai, presiza entrega ba Estadu, atu bele halo dezenvolvimentu. Tanba tuir Konstituisaun RDTL, rai iha funsaun sosiál”, Diretór Romão esplika tan.
Ekipa tékniku sei foti dadus kona-ba rai, iha área ne’ebé mak projetu auto-estrada liubá.
Konsultadór Asian Development Bank husu ba líder komunitária sira no komunidade sira, atu hato’o ideia sira kona-ba kriasaun regulamentu.
