RTTL ho Televizaun Repúblika Indonésia nian servisu hamutuk iha área kapasitasaun rekursu umanu
Sekretáriu Estadu Komunikasaun Sosiál, Nélio Isaac Sarmento, hateten, RTTL E.P. ho Televizaun Repúblika Indonésia (TVRI) nian sei servisu hamutuk iha área kapasitasaun rekursu umanu sira, tanba Televisi Republik Indonesia-TVRI iha ninia sentru formasaun rasik, ho nune’e bele fó treinamentu ba jornalista timoroan, liuliu jornalista sira hosi RTTL E.P. Sekretáriu Estadu hato’o lia hirak ne’e, bainhira halo vizita ofisiál ida ba instalasaun Televizaun Repúblika Indonésia (TVRI) iha Jakarta, iha loron 31 fulan Outubru 2013.
“Iha servisu hamutuk ne’e, parte TVRI sei haruka ninia téknika pofisionál sira atu fó treinamentu iha Dili no RTTL E.P. mós iha oportunidade atu haruka jornalista timoroan sira, tuir treinamentu iha Sentru formasaun TVRI nian, iha Jakarta, ne’e hanesan oportunidade ne’ebé di’ak, tanba jornalista Timor-Leste nian kapasitadu, nu’udar fatór determinante ida mós atu garante kualidade notisia nian,” esplika Nélio Isaac Sarmento.
Sekretáriu Estadu Komunikasaun Sosiál hatutan, ho notísia ne’ebé kualidade di’ak, kontribui mos ba prosesu demokrasia, estabilidade no garante populasaun ninia direitu atu hetan informasaun ne’ebé loloos .
Iha fatin hanesan, Diretór Jeral TVRI ein ezersisiu, Irwan Hendarmin, hateten, TVRI prontu fó treinamentu ba jornalista timoroan sira iha Dili no simu jornalista sira tuir treinamentu iha Jakarta. Aleinde ne’e, TVRI mós prontu simu timoroan sira ne’ebé hakarak halo estájiu iha istalasaun TVRI nian.
Irwan Hendarmin informa, kada tinan Sentru formasaun TVRI halo treinamentu ba Jornalista media eletrónika sira iha área produsaun programa, jestaun no tékniku. TVRI ora-ne’e iha funsionariu hamutuk 5,600, namkari iha estasaun rejionál hamutuk 28 iha provinsia sira. Media públika ne’e, oras-ne’e prepara ona mudansa husi sistema emisaun analog ba sistema dijitál.
