SEPFOPE apoia ekipamentu múzika ba Juventude Nahareka
Sekretaria Estadu Polítika Formasaun Profisionál no Empregu (SEPFOPE), liuhusi Diresaun Nasionál Empregu, fó apoiu ekipamentu múzika ba juventude sira iha suku Nahareka, sub-distritu Ossu, distritu Viqueque, loron 6 Outubru 2013.
Apoiu ekipamentu ne’e entrega diretamente husi Diretór Nasionál Empregu SEPFOPE, Paulo Alves ba Xefe Juventude Nahareka, Anicote Bifen, akompaña husi Xefe suku Nahareka, Paulo A. Ximenes.
Apoio ne’e, bazeia ba pedidu husi komunidade sira ba Prezidente Repúblika RDTL, Taur Matan Ruak, bainhira hala’o vizita ba suku ne’e iha fulan hirak liubá.
Diretór Paulo Alves hateten, “bainhira juventude sira uza didi’ak ekipamentu hirak ne’e, bele mós hetan rendimentu ba sira rasik. Ekipamentu hirak ne’e, sai hanesan rikusoin ba komunidade iha suku Nahareka no bele aproveita hodi dezenvolve di’ak liutan juventude sira-nia talentu”, Diretór dehan.
Xefe Juventude Nahareka, Anicote Bifen, agradese ba SEPFOPE no promete atu utuliza didi’ak ekipamentu hirak ne’e ba komunidade tomak nia interese.
