Timor-Leste partsipa iha Feira Internasionál Macau ba Dala 18
Timor-Leste partisipa iha Feira Komérsiu Internasionál iha Macau ba Dala 18, hahú 17–20 Outubru 2013, ne’ebé hala’o iha Macau. Objetivu feira nian, atu promove kolaborasaun no kooperasaun komersiál no ekonómiku entre Macau, Xina ho parseiru sira husi nasaun língua ofisiál Portugés.
Sekretária Estadu ba Apoiu no Promosaun Setór Privadu (SEAPRI), Veneranda Lemos, mak lidera delegasaun ba feira ne’e, kompostu husi Deputada Ângela Corvelo, Embaixadora Timor-Leste nian iha Pekim, Vicky Tchong, Xefi Gabineti, Asesór Seniór Gabinete no Pontu Fokál Fórum Macau, Tony Duarte, funsionáriu husi Trade Invest no Sentru Bambú Timor-Leste.
Durante feira ne’e, Veneranda Lemos hamutuk ho ninia komitiva halo vizita kortezia ida bá Sekretáriu Ekonomia no Finansa Macau nian, Tam Pak Yuen.
Xefe delegasaun hato’o susesu ne’ebé mak Timor-Leste alkansa, bá iha delegadu no partisipante Fórum bá Komérsiu no Investimentu Internasional 2013. Nia informa mós kona-ba kompetisaun iha setór telekomunikasaun ho operadór na’in tolu, ne´ebé mak kobre ona teritóriu Timor-Leste tomak. Aleinde ne’e, nia halo mós introdusaun kona-ba One-Stop-Shop, SERVE, ne’ebé permite rejistu kompañia foun, renovasaun lisensa tuan, revizaun Lei Investimentu Privadu no iha tempu badak sei lansa Portál Investimentu Timor-Leste.
