Governu Timor-Leste

Ministériu Turizmu, liuhusi Diresaun Nasionál Emprendimentu Atividade Produtu no Turístiku  (DNEAPT), hala’o Asembleia Jerál ba Asosiasaun Empreza Turizmu Timor-Leste (AETTL), foin dadaun iha Ministériu Turizmu, Dili, iha loron 19 fulan Outubru.

Ministru Turizmu, Francisco Kalbuadi Lay, hateten, asosiasaun ne’e harii atu atu halibur emprezáriu sira, hodi hametin dezenvolve turizmu di’ak liutan iha futuru, liuliu iha área Otelaria no Ospitalidade.

“Ohin-loron, área turizmu sai indústria ida importante, tanba mundu tomak oras-ne’e halo kompetisaun ba malu atu investe maka’as ba setór turizmu, nune’e bele hetan lukru maka’as, la’ós depende de’it ba setór mina-rai no gás,” Ministru Francisco Kalbuadi Lay dehan.

Timor-leste prepara-an atu hala’o akordu ho nasaun membru ASEAN sira no Governu Macau, iha loron inisiu Novembru 2013. Objetivu, atu koopera hamutuk hodi dada turista sira mai Timor-Leste no ajuda prosesu dezenvolvimentu setór turizmu nian.

Fernando Lay, Prezidente AETTL eleitu hato’o nia komitmentu atu kolabora hamutuk ho emprezáriu sira, dezenvolve área turizmu iha futuru, hamutuk ho Ministériu Turizmu.