Ministériu Saúde Kapasita Funsiunáriu sira kona-ba Planeamentu Bazeia ba Evidénsia
Ministériu Saúde servisu hamutuk ho ajénsia internasionál WHO, UNICEF, USAID Health Improvement Project (HADIAK), hahú 6-11 Outubru 2013, iha subdistritu Fatubesi, distritu Ermera, halo sorumutu ho funsionáriu kona-ba planeamentu bazeia ba Evidénsia (Evidence-Based Planing).
Diretór Nasionál Política, Planu no Kooperasaun Ministériu Saúde, Ivo Ireneu da Costa Freitas hateten, formasaun kona-ba planeamentu bazeia ba evidénsia ne’e di’ak tebes tanba bele tulun funsionáriu sira atu halo servisu ho di’ak atu nune’e bele kontribui hodi atinji objetivu dezenvolvimentu nasionál nian.
Iha oportunidade ne’e Diretór ne’e, lori Ministériu Saúde nia naran, agradese tebes ba parseiru sira-nia apoiu ba programa sira durante ne’e.
Reprezentante WHO, Luís dos Reis, informa ba WHO prontu nafatin atu suporta Ministériu Saúde hodi hakbiit funsionáriu sira, garante servisu ho efikásia no efisiénsia.
Diretór USAID Health Improvement Project (HADIAK), Reginald Gibson hateten, formasaun ne’e importante atu tulun funsionáriu sira, halo planeamentu ho di’ak. Formasaun ne’e hanesan pilotu ida no sei kontinua halo iha distritu sira seluk.
