Governu Timor-Leste

Embaixadór Brazíl nian iha Timor-Leste, José Amir da Costa Dornelles, hamutuk ho Embaixadór Japaun nian iha Timor-Leste, Yoshita Hanada, entrega iha Ministériu Negósiu Estranjeiru no Kooperasaun, iha loron 25 fulan Outubru nian, komunikadu ida hodi insiste kona-ba nesesidade atu halo reforma Konsellu Seguransa Organizasaun Nasoins Unidas nian.

Tuir komunikadu ne’e, “difikuldade sira Konsellu Seguransa nian atu hasoru dezafiu internasionál sira, inklui dezafiu sira ohin loron nian, husu liután nesesidade atu halo reforma ida hodi reflete di’ak liután realidade jeopolítika sékulu XXI nian no halo Konsellu ne’e reprezentativu, efisiente no transparente liután no, ho ida ne’e, hadi’a efikásia, lejitimidade no implementasaun ninia desizaun sira”.

Ministru Estadu no Negósiu estranjeiru no Kooperasaun, José Luís Guterres, konsidera “fundamentál reforma ida iha Konsellu Seguransa Nasoins Unidas” tanba Timor-Leste sei fó apoiu ba desizaun hirak ne’ebé foti husi G4, aliansa ida entre Alemaña, Japaun, Índia no Brazíl, ho objetivu ida de’it mak atu garante fatin permanente ida iha Konsellu ne’e.