Pilotu timoroan partisipa iha atividade formasaun ida iha Austrália
Ministériu Petróleu no Rekursu Minerál haruka pilotu timoroan na’in lima ba Eskola Aviasaun BASAIR, iha Sydney, Austrália, atu tuir atividade formasaun ida ho objetivu atubele hetan Lisensa Pilotu Multi-Motór ne’ebé Konverte ba Norma Austrália nian sira (CASA). Formasaun ne’e ninia durasaun fulan tolu no hala’o hosi fulan Outubru to’o fulan Dezembru tinan 2013.
Ministru Petróleu no Rekursu Minerál, Alfredo Pires, hateten katak formasaun ne’e hanesan faze preparasaun nian ida, atu pilotu sira bele hetan lisensa, tuir padraun internasionál sira.
“Importante tebes mak ita nia primeiru pilotu sira ne’e, bele hetan sira nia lisensa iha fatin ida ne’ebé di’ak liu iha mundu, mak Austrália. To’o oras ne’e, reputasaun Austrália nian iha indústria aviasaun mak di’ak liu iha mundu. Iha futuru ita sei presiza pilotu ho asa (liras) fiksa atu semo hosi Dili, ba Suai no hosi Suai, ho elikópteru, ba plataforma sira offshore nian, no ida ne’e mak ita oras ne’e prepara hela”, hatete Ministru Alfredo Pires.
Ministru mós tenik tan katak, pilotu na’in-lima ne’e (ida feto no na’in haat mane), sira hotu estudante pós-graduasaun nian, ne’ebé hetan apoiu hosi Ministériu Edukasaun, no sira hetan lisensiatura hanesan pilotu asa fiksa nian, no iha grau baxarelatu iha Siénsia Transporte Aéreo-BSTA nian no ho espesializasaun iha Voo Avansadu, ne’ebé hetan iha tinan 2009 husi Universidade Philsca, iha Filipina.
Alfredo Pires dehan tan “kooperasaun entre Ministériu Edukasaun no Ministériu Rekursu Minerál nian hahú ho Governu da-IV, ne’ebé hakerek iha ne’ebá katak, pilotu sira ne’ebé mak Ministériu Eduksaun haruka ba estuda, sira sei transferidu ba iha Ministériu Petróleu no Rekursu Minerál atu sira bele tau matan ba ninia dezenvolvimentu iha futuru, tanba sira sei iha dalan naruk ida atu la’o-bá. Sira sei partisipa iha atividade formasaun nian barak no sei servisu iha área oioin bainhira sira sai ona pilotu ofisiál”.
Hafoin kompleta tiha formasaun, sira na’in lima sei intrega iha Ministériu Petróleum no rekursu Minerál.
