Ministériu Justisa Sosializa Problema Tráfiku Ba Labarik
Ministériu Justisa liuhosi, Komisaun Nasionál Direitu Labarik, organiza sosializasaun kona-ba tráfiku labarik ba estudante Pre-Sekundária no Sekundária sira hamutuk ema na’in 300, iha loron 8 Outubru, iha Sentru Formasaun Jurídiku Kaikoli, Dili, ho objetivu atu aumenta koñesimentu ba labarik sira kona-ba tráfiku umanu no oinsa labarik sira previne aan husi problema ne’e.
Ministru Justisa, Dionísio Babo, hateten, “tráfiku ba labarik nu’udar asuntu importante tebes iha nasaun ida-ne’e, tanba ne’e, Governu iha dever informa ba labarik sira, atu prepara aan banhira hasoru situasuan tráfiku ba labarik sira. Trafikante sira dada labarik sira, liuliu mane ka feto ne’ebé sei eskola hela. Tanba ne’e tenke husu atu imi respeita profesór no inan-aman sira, bainhira eduka imi iha eskola ka iha uma. Labele hatene de’it direitu, maibé haluha tiha devér”, nia dehan.
Komisária Nasionál Direitu Labarik, Adalgiza Ximenes, husu governante sira, lider lokál, PNTL, komunidade no Inan-aman sira, atu tau atensaun ba labarik sira.
Marka mós prezensa iha sosializasaun ne’e, reprezentante UNICEF ba Timor-Leste no profesór sira.
