Governu Timor-Leste

Sekretáriu Estadu Komunikasaun Sosiál, Nélio Isaac Sarmento, halo vizita ofisiál ba Portugál, hahú hosi loron 23 to’o 27 fulan Setembru, ho objetivu atu hametin kooperasaun bilaterál entre Nasaun rua ne’e iha área Komunikasaun Sosiál nian, aproveita mós oportunidade ida ne’e, hodi promove kontaktu jornalista timor-oan sira ho jornalista sira iha rai li’ur no hasa’e sira nia koñesimentu iha lian portugés, ne’ebé halibur Nasaun ualu CPLP nian.

Nélio Isaac Sarmentu, iha sorumutu ho Sekretáriu Estadu Adjuntu iha Ministériu Adjuntu no Dezenvolvimentu Rejionál, Pedro Lomba, reafirma kona-ba balansu pozitivu hosi kooperasaun entre Nasaun rua ne’e nian no nia omólogu ne’e mós  hato’o Portugál ninia vontade  atu hametin lasu kooperasaun ho Timor-Leste.

Iha vizita ne’e, Sekretáriu Estadu, hala’o mós sorumutu ho reprezentante sira Camões nian – Institutu Kooperasaun no Lian, hodi ko’alia kona-ba vontade Timor-Leste no Portugál, atuhodi kontinua halo kooperasaun iha área Komunikasaun Sosiál nian.

Sekretáriu Estadu Nélio Isaac Sarmento, simu mós hosi Gabinete Meiu Komunikasaun Sosiál Portugés nian sira, ne’ebé mak koordena Programa Apoiu ba Komunikasaun Sosiál Uniaun Europia nian, (kooperasaun delegada iha Portugál), no hosi Ajénsia Lusa. Sekretáriu Estadu halo vizita mós ba Rádiu Televizaun Portugés (RTP), SIC, primeira televizaun privada Portugál nian, Sindikatu Jornalista nian sira, no seluk tan.

Hola parte iha Sekretáriu Estadu Komunikasaun Sosiál ninia komitiva, Jornalista Timor-oan na’in hitu, mak hanesan: Tito Filipe, Prezidente Asosiasaun Jornalsita Timor-Leste; José António Belo, Prezidente Timor-Leste Press Club, Otelio Ote, Prezidente Sindikatu Jornalista Timor-Leste; Suzana Cardoso, Prezidente TILPA, Prezado Ximenes, Prezidente ARKTL, Fransisco da Silva, Diretór ONG TLMDC no Mouzinho Lopes de Araújo, Diretór Jornál Independente, ne’ebé integra iha komitiva ho objetivu atu koñese di’ak liután órgaun komunikasaun sosiál iha Portugál no ninia mekanismu regulasaun rasik.