Governu Timor-Leste

Sekretaria Estadu Defesa (SED), hametin liutan kooperasaun iha área Defeza ho Governu Austrália, liuhusi Asina Akordu ho naran Defense Cooperation Talk (DCT) iha Kuartél Jerál F-FDTL Fatuhada, Dili, loron 4 fulan Setembru. Iha enkontru ne’e, Timor-Leste aprezenta kooperasaun ne’ebé presiza, iha área kapasitasaun rekursu  umanu no martimu no seluk tan.

Prezidente delegasaun Austrália, Neil Orme PSM, apresia tebetebes ho rekomendasaun husi Timor-Leste. Nia hateten, Governu Austrália sei fasilita maka’as kursu lian Inglés ba F-FDTL no Funsionáriu SED iha futuru, liuhusi programa DCT. Kona-ba kooperasaun iha área marítima, Governu Austrália kontinua fó kapasitasaun ba F-FDTL iha área navegasaun no sei hala’o treinamentu konjuntu ida iha área ne’e.

Diretór Jerál SED, João de Corte Real afirma, “enkontru Bilateral ne’e sempre halo tinan-tinan hodi hametin relasaun iha área kooperasaun military. Governu Timor-leste sei presiza tulun husi parseira sira ba área defeza, inklui tulun husi Austrália no Amerika”.

Reprezentante Timor-Leste iha sorumutu ne’e kompostu husi Diretór-Jerál SED João de Corte Real, Brigadeiru Jenerál, Filomeno Paixão de Jesus, Diretór Nasionál Planeamentu Estratéjika Polítika Internasionál (PEPI), Martinho Maia no Komandante Komponente sira inklui Xefé Departamentu SED nian. Reprezentante husi Austrália, kompostu husi Neil Orme PSM (Prezidente delegasaun), Adido defesa Australia, Koronél Luke Foster, Deputy Director Navy International Engagement, Komandante Timothy Byles RAN no seluk tan.