Kamboja no Timor-Leste hakarak esplora área foun sira kooperasaun nian
Primeiru-Ministru Kay Rala Xanana Gusmão, hakotu ninia vizita ofisiál durante loron-haat ba Reinu Kamboja nian, hafoin, bá Repúblika Demokrátika Populár Lau (Laos).
Primeiru-Ministru hahú ninia vizita ofisiál iha kapitál Phnom Penh, ne’ebé akompaña hosi Ministru Turizmu no Sekretáriu Estadu ba Asuntu ASEAN nian, iha kinta-feira, loron 5 fulan-Setembru, ho serimónia boazvindas ida, iha Palásiu Pás nian. Labarik atus resin husi eskola Kamboja nian, forma tuir Estrada ne’ebé liga aeroportu ba palásiu, basa-liman no doko bandeira Kamboja ho Timor-Leste nian bainhira kareta ne’ebé lori delegasaun timoroan nian liu. Primeiru-Ministru Reinu Kamboja nian, Hun Sen, simu Primeiru-Ministru iha eskada Palásiu nian, ho respeitu boot tebtebes.
Iha diskusaun bilaterál, entre xefe Estadu Governu rua ne’e nian, konkorda atu esplora área foun sira kooperasaun nian entre Kamboja no Timor-Leste, nasaun rua ne’ebé ho sira ninia istória no esperiénsia ne’ebé hanesan de’it. Kamboja hatudu nia interese liuliu atu aprende ho esperiénsia Timor-Leste nian iha jestaun ba rekursu petróleu no gás nian. Primeiru-Ministru Xanana Gusmão promete katak Ministru Petróleu no Rekursu Minerál sei halo vizita ba Kamboja, atu halo diskusaun ho ninia omólogu no instituisaun relevante sira seluk.
Primeiru-Ministru Kamboja nian hatudu mós, ninia apoiu tomak ba kandidatura Timor-Leste nian iha ASEAN, ho hanoin katak nasaun ne’e agora iha situasaun ida ne’ebé di’ak tebes hodi tama ba instituisaun rejionál ida ne’e.
Kay Rala Gusmão hatudu ninia admirasaun relasiona ho progresu ekonómiku Kamboja nian ne’ebé hatudu katak nasaun ne’e iha ekonomia ida ne’ebé ho nia kresimentu lailais tebes iha Ázia no iha buat barak ne’ebé mak Timor-Leste presiza tebes atu aprende ho prosesu dezenvolvimentu Kamboja nian, liliu iha área agrikultura no turizmu nian.
Hafoin hala’o tiha sorumutu entre xefe Governu rua ne’e, asina mós memorandu entendimentu ida kona-ba Kooperasaun Ekonómika, Komersiál no Téknika entre nasaun rua ne’e. Tuir kedas ho han-kalan ofisiál ida hamutuk atu fó onra ba Primeiru-Ministru Timor-Leste nian.
Primeiru-Ministru Xanana Gusmão halo vizita ba Memoriál Independénsia, hodi kari aifunan. No ikusliu, Prezidente Asembleia Nasionál simu Primeiru-Ministru. Molok atu liubá provínsia Siem Reap ho aviaun espesiál Governu Kamboja nian, Primeiru-Ministru ho ninia komitiva halo vizita ba Muzeu Jenosídiu Toul Sleng nian, ne’ebé Kay Rala Xanana Gusmão hasoru malu ho sobreviventa sira no rona sira ninia istória.
Iha Provínsia Siem Reap nian, Govarnadór no populasaun lokál simu ho ho respeitu boot tebes delegasaun Timoroan nian. Sira halo vizita ida ba templu famozu Angkor Wat no mós ba fatin oioin sira seluk provínsia nian, ne’ebé sira ko’alia hamutuk ho artezaun (badaen) lokál sira mós asiste rasik, ekonomia país nian ne’ebé sa’e maka’as tebes.
Nune’e, Primeiru-Ministru hakotu ninia vizita ho susesu ba país ida ASEAN nian.
