Governu Timor-Leste

Gabinete Primeiru-Ministru, organiza workshop ho nia Tema “Disiminasaun Lei no Papél Komisaun Anti-Korupsaun (KAK), Komisaun Funsaun Publika (KFP) no Provedoria Direitus Umanu no Justisa (PDHJ)” ba funsionáriu sira hosi Gabinete Primeiru-Ministro nian no funsionáriu sira hosi Ministériu Presidénsia Konsellu Ministrus ne’ebé hetan konvite. Objetivu hosi workshop ne’e atu fó hatene kona-ba dever no direitu hosi KAK, KFP no PDHJ, hodi promove boa Governasaun. Eventu ne’e mak hala’o iha salaun Auditória Prezidénsia Konsellu Ministru nian, durante loron tolu, hahú husi loron 27 to’o loron 29, Fulan Agostu.

Agio Pereira, Ministru Estadu no Prezidénsia Konsellu Ministrus, nu’udar mós Primeiru-Ministru Interinu, iha nia diskursu abertura ne’e hatete,  “Primeiu-Ministru rasik , repete bebeik ba membru Governu sira katak  kna’ar  Governasaun nian tenki tuir Lei, maibé la’ós de’it ba membru Governu sira, ba Diretór sira hotu mós tenke familiariza  ho  Lei  sira ne’ebé  relevante ba  sira nia atividade, tanba sei la familiariza ho lei sira, ita sempre iha perigu boot atu sidi no dala ruma ba monu to’o tribunál atu hatán”.

Primeiru-Ministru Interinu hatutan, “instituisaun tolu, KAK, PDHJ no KFP importante tebetebes ba Check and balance ba Estadu nia prinsípiu fundamentál ida, hodi haburas demokrasia. KAK hanesan ajénsia legál Estadu nian hodi to’o ba fatin ne’ebé mak Estadu labele to’o bá, KAK bele to’o. KFP hanesan kakuluk ida ba funsaun públika tomak. No husu tulun hosi KAK ho PDHJ atu reforsa prosesu sira-ne’e,” nia dehan.

Adjuntu Komisáriu Komisaun Anti Korupsaun, Manuel Bucar, agradese tanba bele hetan opurtunidade atu disemina informasaun kona-ba Komisaun Anti-Korupsaun nian ba funsionáriu sira hotu iha Gabinete Primeiru-Ministru.

“Ne’e di’ak, tanba funsiunáriu sira bele hatene loos kona-ba servisu KAK nian. Dezde harii iha tinan 2010, Komisaun Anti Korupsaun estabelese tiha misaun rua importante. Misaun prevensaun no misaun investigasaun kriminál”, Manuel Bucar esplika tan’’.