Governu Timor-Leste ho Governu Filipina fó kapasitasaun ba tékniku timor-oan
Governu Timor-Leste liuhosi Ministériu Obras Públikas hamutuk ho Departamentu Auto Estrada Obras Públikas husi Governu Filipina nian fó treinamentu ba funsionáriu tékniku Ministériu Obras Públikas na’in 29, durante fulan rua hahú hosi loron 26 fulan Agustu to’o loron 26 fulan Otubru tinan 2013 iha Dili. Matéria ne’ebé fó durante treinamentu ne’e kona-ba infraestruturas Planeamentu, Kualidade, Kontrolu no Manutensaun.
Iha abertura ba treinamentu, Ministru Obras Publikas, Gastão Fransisco de Sousa, hateten, “treinamentu ne’e signifikativu tebes ba hasa’e dezenvolvimentu kapasitasaun rekursu umanu iha Ministériu Obras Públikas.
Ministru hatutan, “kolaborasaun Ministériu Obras Públikas ho Departementu Obras Públicas Auto Estrada Filipina, marka tan pasu ida ba oin no sei kontinua nafatin hodi hametin kooperasaun téknika ho nasaun viziñu sira husi ASEAN. Husu ba formandu sira atu tuir ho vontade, tanba nu’udar ministériu tékniku persiza hetan esperiénsia barak husi rai li’ur. Ita fiar katak, koperasaun ne’e sei tulun dezenvolvimentu iha Timor-leste.”
Formandu sira ne’ebé mai hosi Diresaun Nasionál Estrada Kontrola Xeias na’in 9, Diresaun Nasionál Identifikasaun (5), Diresaun Nasionál Peskiza Dezenvolvimentu (6), Diresaun Nasionál Abitasaun Planeamentu Urbanu (5) no hosi Unidade Jestaun Projetu (Project Manager Unit) na’in 4.
