Estudante tuir Ezame Nasionál 2013
Estudante na’in 37.919 hosi territóriu Timór-laran tomak, hahú loron 2 to’o 4 Setembru 2013, tuir Ezame Nasionál ba tinan letivu 2013.
Hosi númeru ne’e, Ensinu Báziku hamutuk ema na’in 20.811, mane na’in 10.263 no feto na’in 10.548. Ensinu Sekundária jerál hamutuk ema na’in 14.956, mane na’in 7.267 no feto na’in 7.689. Ba nível Ensinu Tékniku Profesionál hamutuk ema na’in 2.152, mane na’in 1.315 no teto na’in 837. Ministru Edukasaun, Bendito dos Santos Freitas, hato’o informasaun ne’e liuhosi konferénsia imprensa hamutuk ho Diretór Edukasaun distritu 13, iha Salaun Ministériu Edukasaun, Vila Verde, Dili, 29 Agostu 2013.
Ministru esplika katak, tinan ida-ne’e métodu koresaun ba pontu ezame nasionál, sei uza mákina dijitál atu garante imparsialidade ba alunu sira-nia nota. Nune’e fatin koresaun, sei konsentra iha Diresaun Nasionál Kurríkulu Ministériu Edukasaun nian.
Ministru husu ba Diretór Distritu sira, atu asegura matéria no fó seguransa másima ba distribuisaun matéria ezame nian, atu labele akontese falla ruma iha dalan molok to’o iha estudante sira nia liman.
Tanba, material Ezame Nasionál ne’e, dokumentu nasaun nian no esensiál tebes. Ministériu Edukasaun distribui matéria ba Diretór Distritu sira no hosi distritu kontinua distribui ba eskola ida-idak.
Tinan ida-ne’e, Governu fó fiar nafatin ba Kompaña Gráfika Nasionál, hodi imprime Materiál Ezame Nasionál Tinan 2013 nian.
