Governu Timor-Leste

Estadu Timor-Leste, iha Tersa-feira, loron 20 fulan Augostu 2013, komemora loron “Frente Armada da Libertação Nacional de Timor-Leste (FALINTIL)” ba dala 38, ho serimónia Desmobilizasaun daruak ba Kombatentes Libertasaun Nasionál Frente Armada sira, hamutuk ema na’in 221, husi distritu 13, iha Suku Benato, Sub-distritu Same, distritu Manufahi, hamutuk iha feto na’in  56 no mane 165.

Prezidenti Repúblika, Taur Matan Ruak iha nia diskursu hateten, “iha tinan 38 liuba, FALINTIL moris iha momentu funu sivil, ne’ebé lori terus no susar ba timoroan sira, no Nasaun komesa loke dalan foun iha ninia istória. Ha’u hakruk iha memória husi sira-ne’ebé mate iha luta ne’e no fó ha’u-nia respeitu ba família sira, husi parte rua, ne’ebé involve iha luta, Fretilin no UDT. Ha’u-nia respeitu no omenajen ba saudozu Francisco Xavier do Amaral, Nicolau dos Reis Lobato no kombatente sira hotu ne’ebé mate durante luta ne’e”.

Nia mós hato’o saudasaun ba lider Timor-Leste sira, Xanana Gusmão, Ma’ Hunu, Mari Alkatiri no José Ramos-Horta, ne’ebé  kontinua servisu maka’as hodi harii pais foun ida-ne’e. Prezidente Taur agradese ba dezmobilizadu no kombatente sira hotu, tanba fó an ba luta no tuba rai metin hodi hahi nafatin sira-nia mehi hodi hetan Nasaun ida livre no prósperu.

“Tempu sei naruk, atu alkansa mehi ba prosperiedade no moris di’ak. Ita presiza luta foun no sakrifisiu foun. Ita tenki hatudu ita-nia determinasaun iha luta, hodi dezenvolve ita-nia rain, hanesan ita hatudu durante luta ba libertasaun,” eis Komandante F-FDTL nee deklara.

Taur Matan Ruak, hatutan tan, “Falintil-FDTL, oras-ne’e esforsu maka’as hodi adapta an ba realidade no kondisaun foun. Timor-Leste, laran metin ona tanba militar iha ona territóriu nasionál, atu proteje ema, rai, tasi no lalehan. F-FDTL mós kontinua hametin nia an, liuhusi treinamentu iha territóriu, rejionál no mundiál. F-FDTL mós halo koperasaun ho nasaun sira seluk, inklui nasaun viziñu no CPLP”.

“Projetu dezenvolvimentu nasionál sira, sei la mosu mesak de’it, presiza serbisu maka’as no espiritu sakrifíisiu. “Ita tenke fó liman ba malu no serbisu hamutuk, dezenvolve ita-nia rain no kontribui hodi hasa’e ekonomia no garante moris di’ak ba Timoroan sira,” nia dehan tan.

Partisipa iha serimónia ne’e, Primeiru Ministru, Kay Rala Xanana Gusmao, Vise Primeiru Ministru, Fernando Lasama de Araujo,  Prezidente Parlamentu Nasionál, Vicente Guterres, Vise Presidente parlamentu Nasionál, Adriano Nascimento, Prezidente Tribunal Rekursu, Cláudio Ximenes, Xefé Estadu Major Jenerál F-FDTL nian, Major Jeneral Lere Anan Timur, Komandante Jerál Polisia Nasionál Timor-leste (PNTL), Comissáriu Longuinhos Monteiro, Ambaxador husi nasaun belun sira, sosiedade sivil no komunidade Manufahi.