SEAPRI simu apoiu husi Nova Zelándia ba Projetu BOSS
Sekretária Estadu ba Apoiu no Promosaun Setór Privadu, Veneranda Lemos, Embaixadór Nova Zelándia nian, Tony Fautua, no Vise-Diretora Organizasaun Internasionál Servisu nian OIT (sigla iha lian Portugés) ba Indonézia no Timor-Leste, Michiko Milyamoto, iha loron 23 fulan Agostu asina akordu ida iha ne’ebé Nova Zelándia fó apoiu finanseiru ba projetu BOSS (Business Opportunity and Support Services), projetu ida kona-ba biban ba negósiu no servisu apoiu nian sira.
Nova Zelándia sei kontribui ho dólar amerikanu millaun 3,9 ba projetu BOSS, ne’ebé mak hala’o knaar sira hodi orienta empreza sira timoroan nian, inklui empreiteiru no atubele dezenvolve pekuária, nune’e mós ho setór turizmu no ortikultura.
Projetu BOSS nian OIT no Institutu Apoiu ba Dezenvolvimentu Emprezariál (IADE) mak implementa, ne’ebé iha tutela hosi Sekretaria Estadu ba Promosaun no Apoiu Setór privadu nian (SEAPRI).
Veneranda Lemos sente haksolok ho kooperasaun husi Nova-Zelándia nian no nia dehan katak “kontribuisaun husi Nova zelándia ba projetu BOSS hanesan ezemplu pozitivu ida husi parseiru dezenvolvimentu nian ida ne’ebé aliñadu ho Planu Estratéjiku Dezenvolvimentu Governu nian. Governu Timor-Leste da-V hakarak atu setór privadu sai hanesan fonte kreximentu rendimentu nian no mós empregu nian iha zona rurál sira”.
Tuir Tony Fautua, “Nova Zelándia haree setór privadu emprezariál ida ne’ebé ativu hanesan buat ne’ebé vitál ba dezenvolvimentu Timor-Leste nian. Ami sente haksolok tebetebes atu servisu ho Governu Timor-Leste hodi dezenvolve setór-xave sira ba kreximentu no servisu apoiu ba dezenvolvimentu negósiu nian liuhusi projetu BOSS. Apoiu husi Nova Zelándia nian, iha durasaun projetu ne’e, sei kria empregu maizumenus 1.000 no oportunidade harii empreza iha komunidade hamutuk 750”.
Nune’e mós ho Jurgen Schwettmann, Diretór Parseria OIT no Departementu Kooperasaun ba Dezenvolvimentu reforsa kontribuisaun signifikativa ne’ebé mak projetu ne’e fó ba iha kriasaun empregu sira: “Ho rezultadu husi projetu BOSS nian to’o ohin loron, ha’u fiar katak fundu ne’ebé Nova Zelándia hasai ne’e aplika ho di’ak. Hanesan ezemplu, estudu ida foin dadaun ne’e kona-ba kursu formasaun iha jestaun negósiu husi IADE hatudu katak, ba emprezáriu no prestadór servisu nian sira ne’ebé maka partisipa iha formasaun IADE nian, reseita hosi fa’an nian sa’e ba média 40%”.
