Governu Timor-Leste

Iha loron 15 fulan-Agostu, Governu Timor-Leste asina Akordu ida ho Governu Japaun, iha Ministériu Negósiu Estranjeiru no Kooperasaun, atu halo reabilitasaun ba ponte Mola iha subdistritu Zumalai, distritu Suai. Akordu “Projetu Formasaun ba protesaun ponte Mola” ne’e, assina husi José Luís Guterres, Ministru Negósiu Estranjeiru no Kooperasaun nu’udar reprezentante Governu Timor-Leste no Yoshitaka Hanada, Embaixadór Japaun nu’udar reprezentante Governu Japaun.

Tuir José Luís Guterres, “Akordu ne’e importante, la’ós de’it iha nível dezenvolvimentu ekonómiku, maibé mós kona-ba ligasaun entre populasaun sira, liuliu durante tempu-udan. Hosi ita-nia parte, ita fó nafatin buat ne’ebé mak di’ak liu hodi hametin liután ita-nia relasaun amizade no kooperasaun ho Japaun”.

Ho Akordu ida ne’e, Governu japonés hakarak atu hadi’a kondisaun moris populasaun nian nomós atu kontribui ba dezenvolvimentu Kosta Sul país nian. Faze tuirmai atubele realiza projetu ne’e mak loke prosesu konkursu obra ne’e nian, ne’ebé hetan orsamentu miliaun 11 dólar amerikanu.

Ponte Mola harii ona durante okupasaun indonézia nian iha tinan 1996. Entre tinan 2008 no tinan 2011, ponte ne’e hadi’a filafali ona, maibé tanba udan-boot no inundasaun beibeik, populasaun sira labele utiliza ponte ne’e no hakotu ligasaun hosi mota-sorin ida ba sorin ida seluk.