Governu Timor-Leste

Primeiru-Ministru Xanana Gusmão, loron Kinta-feira, 15 Agostu 2013 simu vizita husi eis Primeiru Ministru Reinu Unidu, Tony Blair ho nia komitiva iha salaun enkontru MInistériu Finansa, Dili.

Iha enkontru ne’e, hala’o kuaze oras-ida, partisipa mós Ministru no Vise-Ministru Negósius Estranjeiru no Kooperasaun, Vise-Ministra Finansa, Ministru Edukasaun, Ministru Agrikultura, Sekretáriu Estadu ba Fortalesimentu Institusionál no Embaixadór Timor-Leste nian husi Reinu Unidu.

Objetivu husi vizita ne’e, atu fahe nia esperiensia ba Timor-Leste kona-ba Governu nia sistema administrasaun, manajementu rekursu umanu no seluk tan.

José Luís Guterres esplika, eis Primieiru-Ministru, Tony Blair iha esperiénsia no susesu kaer governasaun no administrasaun iha Inglatera, durante tempu barak. Hafoin enkontru, José Luís Guterres informa, Tony Blair no Primeiru-Ministru diskuti kona-ba presepsaun polítika kona-ba sistema administrasaun no governasaun Timor-Leste nian iha futuru.

Eis Primeiru-Ministru Británico ne’e, prontu atu ajuda Timor-Leste iha prosesu hametin sistema administrasaun di’ak, efesiente, transparente no modernu, tuir fo hatene Primeiru-Ministru Xanana Gusmão.

Iha opurtunidade ne’e, Tony Blair kompromete atu ajuda Timor-Leste iha área Boa Governasaun. Nia mós apoia Timor-Leste atu sai membru ASEAN (Association of South East Asia Nations), atu bele loke kooperasaun bilaterál ho nasaun sira iha mundu, hodi aselera dezenvolvimentu iha nasaun Timor-Leste.