Komunidade distritu Oe-cusse Ambeno entrega rai ba SEPFOPE
Komunidade sira iha suku Naimeco sub-distritu Pante Makasar distritu Oe-cusse Ambeno, entrega rai ektare 1 ba Sekretáriu Estadu ba Polítika Formasaun Profisionál e Empregu (SEPFOPE) hodi harii sentru formasaun, iha loron 1 fulan Agostu 2013, liuhusi rituál tradisionál tara bandu nian.
Rai ektare ida-ne’ebé mak lian-na’in sira entrega, husi aldeia haat mak hanesan aldeia Baqui, Bonemesa, Neco no Teinae. Alemde entrega ho rituál tradisionál, lia-na’in sira mós asina akta, hamutuk ho Administradór distritu Oe-cusse Ambeno, Salvador da Cruz, Terras no Propriedade distritu Oe-cusse Ambenonian no Sekretáriu Estadu ba Polítika Formasaun Profisionál e Empregu, Ilídio Ximenes da Costa.
Raimundo, lia-na’in husi Suku Naimeco hateten, komunidade hakarak entrega ra ne’ei, tanba bele tulun kapasitasaun ba jerasaun sira iha futuru.
Entidade Governu ne’e, iha ninia diskursu hateten, “sente haksolok no agradese ba komunidade tanba hakarak entrega rai, atu jerasaun foun sira bele uza iha futuru”.
“Ohin loron, ema susar tebes atu entrega rai ba governu, atu hodi halo dezenvolvimentu. Komunidade suku Naimeco hanoin di’ak ba dezenvolvimentu, liuhusi entrega rai ektar ida. Ne’e realidade ne’ebé hatudu komunidade nia partisiapasaun iha dezenvolvimentu nasionál,” Ilido haktuir tan.
Durante iha Oe-cusse Ambeno, Sekretáriu Estadu mós vizita grupu auto-empregu iha suku Taiboco no suku Lela-Ufa, subdistritu Nitibe, distritu Oe-cusse Ambeno.
