SEPFOPE sei estabelese sub-komisaun indústria mina no gas
Sekretaria Estadu Polítika Formasaun Profisionál no Empregu (SEPFOPE), loron 30 fulan Jullu, iha sala konferénsia Timor-plaza, Komoro, Dili, organiza sorumutu hamutuk ho Ministériu Petróleu no Rekursu Minerál kona-ba planu estabelesimentu sub-komisaun indústria iha área mina no gas.
Partisipante sira iha sorumutu ne’e, maihosi kompañia indústria, setór privadu no sosiedade sivil, ho objetivu atu haluan rede ho parseiru dezenvolvimentu ba implementasaun indústria mina no gas.
Sekretáriu Estadu Polítika Formasaun Profisionál no Empregu, Ilídio da Costa Ximenes, esplika, “Sorumutu ne’e importante tebetebes atu aselera dezenvolvimentu, liuliu halibur ideia, atu bele kria sub-komisaun mina no gas no prepara kona-ba rekursu umanu”.
“Ita-nia rai riku, maibé ita iha limitasaun rekursu umanu no númeru dezempregu aas. Entaun, oinsá mak buat rua ne’e, bele kompleta malu. Ita presiza tau ideia hamutuk atu hetan solusaun”, Ilidio hateten.
Iha biban ne’e, Ministru Petróleu no Rekursu Minerál, Alfredo Pires, informa, “Atu resolve dezafiu sira ba dezenvolvimentu mina no gas, presiza liuhosi servisu hamutuk interministeriál”.
“Ami responsabiliza iha minarai no SEPFOPE sei responsabiliza kona-ba treinamentu sira. Maibé, to’o ohin-loron seidauk hala’o ho máximu. Ne’e dezafiu ida, atu ita rezolve,” Ministru Alfredo hatutan.
Ministru mós konkorda atu tau atensaun ba dezenvolvimentu rekursu umanu iha rai laran, liuhusi treinamentu intensivu atu bele prienxe kritéria servisu nian iha kompañia sira.
Nia informa mós, kona-ba projetu husi Kosta Sul tama ona iha tenderizasaun. Nune’e, SEPFOPE bele aliña ho esforsu ne’ebé iha atu ajuda setór privadu sira, prepara didi’ak servisu na’in sira.
Ema sira ne’ebé mak aban bainrua servisu iha Kosta Sul, tenke iha didikasaun, badinas no labele halo problema, nune’e sector indústria sira bele la’o ba oin,” Ministru tenik tan.
