Governu Timor-Leste

Atu atende vítima dezastre naturiál sira iha Timor-Leste ho efisiénsia no efikásia, Ministériu Solidariedade Sosiál (MSS) konvoka enkontru Inter-Ministeriál no parseiru desenvolvimentu sira iha salaun edifísiu sentrál MSS, iha Kaikoli, Dili, loron 25, fulan Jullu.

Objetivu husi enkontru ne’e, atu halibur informasaun kona-ba atividade kada Ministériu nian hodi  atende ba vítima dezastre naturál sira no oinsá halo preparasaun no asaun husi Ministériu sira hodi hatan ba situasaun emerjénsia.

Ministra Solidariedade Sosiál, Isabel Amaral Guterres, iha nia diskursu hateten, durante tinan 2013, dezastres barak akontese iha Timor-Leste. Bainhira akontese dezastre naturál sira, Ministériu relevante servisu hamutuk ho Ministériu sira seluk hodi atende ba vítima sira iha distritu ida-idak.

“Maibé Ministériu ida-idak presiza hadi’a di’ak liután sira nia servisu ho efisiénsia no efikásia atu bele hatan ba dezastre naturál sira ne’ebé mak vítima sira hasoru”, Ministra MSS hateten.

Iha sorin seluk, Vise-Ministru Solidariedade Sosiál, Jacinto Rigoberto Gomes de Deus, esplika, “enkontru inter-ministeriál no parseiru dezenvolvimentu sira, atu hametin fali koordenasaun ba área dezastre, atu sukat kbiit no frakeza, relasiona ho atendimentu ba dezastre naturál sira ne’ebé atual”.

Importante teb-tebes kria mekanizmu koordenasaun di’ak, forti no beibeik, atu hatene kbiit ida-idak  nian iha pos-dezastres, hodi identifika loloos  fatin ne’ebé mak hetan tiha ona atendimentu, seidauk hetan atendimentu no fatin ne’ebé mak hetan atendimentu dupla,” Vise Ministru ne’e hatutan.

Vise Ministru MSS, hato’o apresiasaun pozitivu ba entidades hotu ne’ebé durante ne’e fó sira nia solidariedade,  hodi bele hatan lalais ba vítima dezastre naturál sira.

Iha enkontru ne’e, UNDP aprezenta estudu kona-ba fatin sira-neebé mak iha risku ba dezastre naturál, atu halo planu minimizasaun no prevensaun.

Sekretáriu Estadu Meio-Ambiente, Nominando Soares Martins dehan, “dezastre naturál mosu tanba mudansa klimátika, ne’ebé lori impaktu mai Timor-Leste. Ne’e forsa natureza mak boot liu kapasidade intelektuál umanu. Dalabarak mós dezastre mosu tanba komunidade balun estraga natureza”, nia hatutan.

Partisipa enkontru ne’e, Vise-Ministru Agrikultura no Peskas, Marcos da Cruz, Vise-Minstra Saúde ba Asuntus Étika no Prestasaun Servisu, Natália de Araújo, Sekretáriu Estadu Seguransa, Francisco da Costa Guterres, Sekretáriu Estadu Floresta no Konservasaun Natureza, João Cardoso Fernandes, Sekretáriu Estadu Asuntus Kombatentes Libertasaun Nasionál, Júlio Sarmento da Costa, Diretór sira, Xefes Departamentu, Asesór Nasionál no Internasionál sira, Komandante PNTL no F-FDTL (marítima), Reprezentante UN, Parseiru Dezenvolvimentu sira, Sosiedade Sivíl no reprezentante emprezáriu sira husi Konsórsiu Nasionál Timorense nian (CNT).