Governu Timor-Leste

Ministériu Obras Públikas, liuhosi Sekretaria Estadu Bee, Saneamentu no Urbanizasaun, servisu hamutuk ho Ministériu Saúde no Ministériu Edukasaun ho apoiu hosi UNICEF, organiza workshop kona-ba Programa Bee, Saneamentu no Igiene iha Komunidade (BESIK), loron 30 fulan Jullu iha Ótél Ramelau, Aimutin, Dili.

Workshop ne’e hala’o ho objetivu, atu diskuti kle’an liu kona-ba Termu Referénsia atu estabelese koordenasaun iha nivél nasionál no distritu.

Vise Ministra Saúde, Natália de Araújo, haktuir, “Governu iha ona polítika nasionál saneamentu báziku nian, ne’ebé serve hanesan referénsia atu dezenvolve estratéjia planu atividade no implementasaun, hodi atinji meta sira dezenvolvimentu millenium no mós planu estatratéjiku nasionál”.

Natália de Araújo husu ba Komisaun Bee, Saneamentu no Ijiene hosi distritu 12, hametin liña koordenasaun ho efetivu no efisiénsia, hodi hadi’a populasaun nia moris.

“Koordenasaun, kooperasaun hanesan xave ba mudansa hahalok kona-ba ezijénsia ba bee, saneamentu no ijiene. Ho mudansa ki’ik hosi tempu ba tempu, ita bele transforma komunidade no instituisaun sira, ba moris saudavél, atu reduz moras diarreia, infesaun, no hatun numéru ema mate,” nia dehan tan.

Iha parte seluk, Sekretáriu Estadu Bee, Saneamentu no Urbanizasaun, Elias Pereira Moniz, hateten, “asuntu bee, saneamentu no ijiene tama ona iha planu estratéjiku dezenvolviemtnu infra-estrutura ba tinan 2, mak hanesan dezenvovlimentu sosiál, infraestrutrutara no ekonomia. Atu atinji objetivu ne’e, presiza iha koordenasaun di’ak. BESIK la’ós iha liafuan de’it, maibé tenki hatudu mós implementasaun iha terenu”.