Governu Timor-Leste

Sekretaria Estadu Seguransa (SES) organiza semináriu loron ida nian, iha loron 15 fulan Jullu, iha Salaun Enkontru Sentru Formasaun PNTL Komoro, Dili, hodi diskuti kona-ba proposta vizaun estratéjika Polísia Nasionál Timor Leste (PNTL) nian ba tinan 2014 – 2018, iha futuru ho ninia tema, “Ho Vizaun Estratéjika, Ita Hakat ba Futuru Objetivu Instituisaun Nian”.

Primeiru-Ministru no Ministru Defeza no Seguransa, Kay Rala Xanana Gusmãoo hateten, podér seguransa entrega tomak ona ba PNTL, tamba ne’e, membru PNTL tenki hatudu komportamentu di’ak iha povu nia leet. “Ha’u husu ba imi hotu, atu so’e tiha komportamentu ne’ebé  ladun di’ak iha instituisaun PNTL. Selae, ita maka sei la’o iha fatin de’it. PNTL tenke hametin kultura, respeitu no la’o tuir ordem,” Xanana Gusmão hateten.

Xanana mós husu ba ofisiál sira iha Polísia, atu servisu hamutuk ho membru polísia sira no kaer metin unidade iha Instituisaun.

Iha fatin hanesan, Komandante Jerál  PNTL, Komisáriu  Longuinhos Monteiro  informa, durante diskusaun proposta kona-ba  vizaun estratéjika PNTL  nian ba períudu 2014 – 2018,  ko’alia mós kona-ba vizaun kurtu prazu, husi vizaun no objetivu PNTL nian.

Longuinhos mos informa, “Polísia Nasionál iha nia atividade lorloron, mak kaer metin regra instituisaun, inklui mós buka garante seguransa ba povu nia moris.

Partisipa iha semináriu ne’e, Sekretáriu Estadu Seguransa, Fransisco Guterres, Sekretáriu Estadu Defeza, Júlio Tomás Pinto, Xefé Estadu Maijór F-FDTL, Brigadeiru Jenerál  Filomeno Paixão, Diretora Jerál SES, Guilhermina Ribeiro, Komandante PNTL Distritu no Ofisiál sira PNTL nian.