Governu Timor-Leste

Ministériu Turizmu liuhosi Diresaun Nasionál Rekursu Umanu (DNRU) no Diresaun Nasionál Emprendimentu Atividade no Produtu Turístiku (DNEAPT), servisu hamutuk  ho Sekolah Tinggi Pariwisata (STP) Bali, Indonézia, halo formasaun ba área Ospitalidade no Otelaria hahú loron 22 to’o loron 27 fulan Jullu 2013 iha Sentru Konvensaun Díli.

Ministru Turizmu, Francisco Kalbuadi Lay esplika, “área Ospitalidade no Ótelaria importante tebes ba setór turizmu, tanba Timor-Leste nia imajen iha públiku, depende mós ba kualidade atendimentu hosi ótel no restaurante”.

Ministériu Turizmu iha perspetiva atu halo monitorizasaun, hadi’a ótelaria no restaurante sira, atu obedese ba padraun.

Kalbuady mós promete atu fó bolsu estudu ba jerenti ótel no restaurante sira, nomós halo estudu komparativu ba Indonézia no Austrália, atu aumenta kuñesimentu no esperiénsia di’ak liután.

Iha oportunidade ne’e, Diretór Sekolah Tinggi Pariwisata, Drs. Dewa G. N. Byomantara, M.Ed, agradese ba Governu Timor-Leste, liuhosi Ministériu Turizmu, tanba fó oportunidade hodi fó formasaun ba timoroan sira.

Drs. Dewa rekoñese Timor-leste iha poténsia turizmu nian boot tebes, maibé, presiza prepara rekursu umanu atu dezenvolve setór ida ne’ebé mak sei naturál hela.

Durante treinamentu, fasilitadór sira fó materiál kona-ba maneira fa’an produtu turístiku, oinsá prepara dezeñu turizmu ne’ebé mak bele atrai turista, oinsá dezenvolve fatin turizmu no modifika fatin ne’ebé la’os destinu turizmu, bele sai fatin turizmu.

Partisipante ba treinamentu ne’e hamutuk na’in 53, kompostu husi Restaurante na’in 8 no na’in 45 husi Ótelaria.