Governu Timor-Leste

Ministériu Administrasaun Estatál no Ministériu Finansa organiza Sorumutu Kordenasaun Dezenvolvimentu Nasionál (SKDN) – 2013, ho tema “Sinkronizasaun planu Investimentu 2014 ba Distritu 13 ho Liña Ministeriál sira”, iha Ótel Timor, Dili, loron 17 fulan Jullu .

Bainhira loke sorumutu ne’e, Primeiru-Ministru, Kay Rala Xanana Gusmão, hateten, “Hahú tinan 2014 sei laiha aprovasaun orsamentu ba projetu ne’ebé seiduak entrega BoQ no Dezeñu. Bainhira ita hakarak moris iha kualidade, ita tenki haka’as aan hodi iha dixiplina no mós iha espíritu responsabilidade”.

Primeiru-Ministru hatutan tán, “Enkuantu povu sei moris aat, kualidade ne’e importante tebetebes. Atu haree ba kualidade, Xanana ezije maiór rigór iha dezempeñu prosesu fiskalizasaun, tanba bainhira fiskalizasaun la’o di’ak, Governu la’o ho kontente, povu mós contente”.

Tuir Ministru Administrasaun Estatál, Jorge da Conceiçao Teme, “Objetivu husi sorumutu ne’e, atu diskuti no sinkroniza proposta planu dezenvolvimentu distritál no planu dezenvolvimentu nasionál”.

Ministru deklara tan, “Sorumutu ne’e mak faze ikus hosi prosesu planeamentu PDID (Planeamentu Dezenvolvimentu Intregradu Distritál) nian. Maibé ba ita-boot sira ne’ebé mak implementa PDID, prosesu ida-ne’e hanesan prosesu naruk ida, ne’ebé nia planeamentu hahú iha fulan Fevereiru liubá”.

Jorge da Conceiçao Teme louva administradór distritu, maibé husu nafatin atu intensiva no hametin liután komunikasaun no koordensaun, hodi hadi’a prestasuan servisu no kualidade projetu sira.

Kona-ba desentralizasaun, Ministériu Finansas harii ona Diresaun Nasionál dekonsentrasaun Finanseira, atu bele jere osan ne’e no funsiunáriu sira tuir hela formasaun, atu ajuda prosesu servisu iha distritu sira”.

Marka prezensa iha sorumutu ne’e, Vise Primeiru-Ministru, Fernando Lasama de Araújo no Membru Governu sira hotu, administradór distritu no subdistritu sira, sosiedades sivil no mós funsionáriu públiku sira.