Governu Timor-Leste

Sekretáriu Estadu Água, Saneamentu no Urbanizasaun, Elias Pereira Moniz no reprezentante ADB iha Timor-Leste, Shayne Rosental, inaugura projetu abastesimentu bee-moos ba area urbana sira, iha aldeia 4 Setembru Kintál-Boot, Suku Santa Cruz, Sub-distritu Na’in-feto, Distritu Dili, loron 18 fulan Jullu 2013.

Objetivu, atu hadi’a abastesimentu bee ba uma kain, komersiante no instituisaun sira iha kapitál Dili, liuhusi hadi’a jestasaun hidrólika sistema abastesimentu bee.

Sekretáriu Estadu Água, Saneamentu no Urbanizasaun, haktuir “Governu Timor-Leste hetan apoiu projetu ida ne’e hosi Banku Dezenvolvimentu Aziátiku (ADB).

Elias Pereria hatutan, “MOP tenta atu implementa metas hirak ne’e iha planu estratéjiku desenvolvimentu Timor-Leste nian. Ne’e hanesan projetu pílotu, ne’ebé sei aplika mós ba zona seluk no kapitál distritu hotu-hotu”.

Diretór SAS, Gustavo da Cruz esplika, “tuir mapa, sistema abastesimentu iha sidade Dili fahe ba zona 10, bazeia ba dekretu lei no. 4/2004 kona-ba rejime fahe bee ba públiku. Diresaun Nasionál Servisu Bee no Saneamentu, hala’o hela programa no planu kada tinan atu hatan ba nesidade ba bee-moos ba komunidade sira.

Projetu abastesimentu bee-moos iha sidade DIli,  fahe ba sub zona tolu. Primeiru, sub zona suku Kampung Alor no suku Fatu-hada, segunda, sub zona suku Bairo-Pité no terseiru sub zona Suku Santa Cruz no Suku Bee-mori.

Gustavo da Cruz informa, “Objetivu atu estabelese sistema tarifa bee, ne’e sei hahú iha fulan Agostu’.

Reprezentante ADB iha Timor-Leste, Shayne Rosental, hateten, “Oras ne’e konsege atinji ona objetivu fornesimentu bee-moos ba komunidade sira iha zona 3, iha Dili no iha distritu sira seluk”. Shayne apela mós ba ema hotu, atu kontribui no tau matan ba ninia operasaun no manutensaun, atu nune’e sistema bee-moos ne’ebé monta tiha ona bele kobre nesesidade komunidade to’o iha tempu naruk.