Governu Timor-Leste

Sekretáriu Estadu Juventude no Desportu, Miguel Manetelo, fó pose ba membru Parlamentu Foin-sa’e na’in 132 períudu 2013–015 iha Centro Convensaun Díli (CCD), loron 18 fulan Jullu 2013, hodi truka membru Parlamentu Foin-sa’e anteriór, períudu 2011–2013.

Membru sira kompostu husi mane 66 no feto 66, maihusi Sub distritu 65 iha teritóriu tomak, hili liuhusi eleisaun nakloke, hahú husi Suku to’o Sub distritu.

Miguel Manetelo, iha ninia intervensaun fó parabéns ba membru Parlementu Foin-sa’e sira, “Ha’u husu ba imi, atu labele hanoin halo krítika de’it. Maibé importante liu, mak tenke halo transformasaun no komunikasaun di’ak entre juventude no komunidade”.

Entertantu, Prezidente Konsellu Nasionál Foin Sa’e Timor-leste (KNFSTL), Leovigildo Hornai informa, “husi juventude na’in 132 ne’e, iha ema na’in rua maihusi defisiente, ne’ebé mak prienxe mós kritéria. Pursentu 50 husi feto no 50 husi mane, inklui maluk difisiente”.

Leovigildo esplika tan, “membru parlamentu sira-ne’e, sei hala’o atividade iha ida-idak nia sub-distritu. Durante tinan rua hala’o atividade iha distritu, SEJD, UNICEF no KNFSTL, atu akompaña no fó kbiit ba foin-sa’e sira”.

Iha fatin hanesan, Lizério da Silva Dias, reprezentante membru Parlamentu Foin-sa’e, promete sei hala’o knaar ho di’ak atu reprezenta duni juventude sira-nia aspirasaun.

Marka prezensa iha serimónia Tomada de Posse ne’e, Prezidente Repúblika, Taur Matan Ruak, Ministra Solidariedade Sosiál, Isabel Amaral Guterres,  Diretór sira iha  SEJD nomós konvidadu sira.