Governu Timor-Leste

Ministériu Justisa (MJ) liuhusi Diresaun Nasionál Rejistu no Notariadu (DNRN), halo’o serimónia distribuisaun sertifikadu sidadania ba sidadaun estranjeiru sira na’in 574 iha edifísiu Ministériu Justisa, sesta-feira, loron 29 Juñu.

Ministru Justisa, Dionísio Babo, hateten katak nasionalidade ba ema estranjeiru sira, prevee tiha ona iha Lei Nasionalidade nian N.^o 9/2002 loron 5 fulan Novembru no Regulamentu Lei Nasionalidade no Dekretu-Lei N.^o 1/2004, loron 4 fulan Fevereiru kona-ba filiasaun, adosaun, kazamentu, naturalizasaun no naturalizasaun tanba hala’o funsaun boot no knaar importante sira.

Atu hetan sidadania timoroan, ema estranjeiru ida tenke prienxe rekezitu sira mak hanesan: tenke kaben liu ona tinan 5 no hela iha territóriu nasionál maizumenus tinan rua, hela fatin no hela nafatin iha territóriu Timor-Leste maizumenus tinan sanulu, hatene ko’alia lian ofisiál ida no hatene istória no kultura Timor nian, no selukseluk tan.

Sidadaun estranjeiru sira ne’ebé hetan ona sertifikadu sidadania nian, sira iha diretu  atu hetan asisténsia sosiál husi Estadu Timor-Leste, hanesan mós sidadaun seluk.

Ministru Dionísio, mós informa, sidadaun estranjeiru sira balun ne’ebé kaben ho Timor-oan hahú tinan 1975, to’o ohin loron seidauk hetan nasionalidade, tanba la hatene ko’alia lian ofisiál, lahatene hakerek no lee.

Diretora Diresaun Nasionál Rejistu no Notariadu, Maria do Rosario Fátima,  informa, “ema estranjeiru sira ne’ebé hetan ona nasionalidade, liuhusi kazamentu, hahú kedas  tinan 2006 to’o tinan 2013, maihusi  nasaun Indonézia, Austrália, Bangladesh, Pakistan, Índia, Angola, Filipina no Vietnam”.