Governu lansa primeira pedra ba projetu estrada Díli-Liquiçá-Ermera
Ministru Obras Públikas, Gastão de Sousa, hamutuk ho Prezidente Komisaun E, asuntu Infraestrutura Parlamentu Nasionál, Pedro da Costa, iha Kinta loron 11 fulan Jullu 2013 iha Tibar, halo lansamentu primeira pedra ba reablitasaun estrada ho nia distánsia kilómetru 60, uza totál orsamentu tokon USD $ 50.
Estrada ne’ebé liga Dili to’o Liquiça, kilómetru 28.62 ho totál orsamentu tokon USD $ tokon 20 resin, inklui manutensaun. No husi Tíbar ba Gleno, distritu Ermera ho distánsia kilómetru 31.89 ho totál orsamentu USD $ tokon 29 resin, inklui manutensaun.
Iha diskursu, Ministru Obras Públikas, Gastão de Sousa, informa, “projetu ne’e sei ezekuta durante tinan 4 (fulan 47-Red) ho pavimentasaun sei uza alkatraun hot mix, sei dura to’o tinan 20”.
Tuir Ministru Gastão, Governu Timor-leste empresta fundu ba projetu ne’e husi Banku Áziatiku ba Dezenvolvimentu (ADB) no fundu Governu Timor-Leste liuhosi Orsamentu Jerál Estadu.
Ministru esplika, “Projetu sira ne’e, kumpri regra no prosedimentu hotu, ne’ebé Governu Timor-Leste estabelese tiha ona, molok hakat ba faze implementasaun. Dokumentus hotu kona-ba ninia implementasaun, uluk nana’in hetan tiha revizaun husi Instituisaun Governu nian, hanesan Sekretariadu Grande Projetu, Ajénsia Dezenvolvimentu Nasionál, Komisaun Nasionál Aprovazionamentu no ikus liu aprovasaun husi Tribunál de Kontas”.
Prezidente Komisaun E Asuntu Infraestruturas Parlamentu Nasionál, Pedro da Costa Mártires, haktuir “programa ne’e tama ona iha Planu Estratéziku Dezenvolvimentu Nasionál (PEDN) atu hadi’a infraestrutura bázika. Ita hotu hakarak atu povu iha asesu ba benefísiu ekonómiku sosiál. Hanesan reprezenante estadu nian, tenke fó garantia ba ita nia povu liuhusi asesu ba estrada di’ak”.
Administradór Distritu Ermera, Victor dos Santos, husu ba empreza sira atu halo konstrusaun ho kualidade di’ak, ne’ebé sei fó impaktu di’ak ba dezenvolvementu ekonómika ba povu iha distritu rua, Ermera ho Likisá.
Kompañia SAN Jose S.A, España mak ezekuta projetu reabilitasaun estrada Dili –Liquiça no kompañia PT. Pembangunan Perumahan Persero PDK, Indonézia mak reabilita estrada husi Tibar to’o Gleno, distritu Ermera.
