Defensór Públiku estajiáriu sira simu pose
Defensór Públiku Estajiáriu na’in lima, iha sesta-feira, loron 21 fulan Juñu, simu pose husi Defensoria Públika, Sérgio Hornai, iha edifísiu Defensoria Públika iha Maskareñas.
“Onra boot ida ba ita hanesan instituisaun autónomo ne’ebé agora iha tutela Ministériu Justisa nian no iha tinan barak ita halo esforsu hamutuk ho ita nia parseiriu sira atu dezenvolve instituisaun ida ne’e sai di’ak liután hodi fó asisténsia ba ita nia sidadaun sira tuir Lei no Konstituisaun haruka. Ho serimónia fo pose ida ne’e, hanesan pasu ida tan ba ita atu hakat ba oin”, hatete Sérgio Hornai.
“Hodi Ministériu Justisa nia naran, nu’udar Prezidente Konsellu Superiór Defensoria Públika, hato’o parabéns ba Defensór Públiku Estajiáriu na’in lima, ne’ebé simu ona posse hanesan Defensór Públiku. Timor-Leste hanesan país ida ne’ebé diferente ho país sira seluk foin ukun-an, maibé Estadu harii ona Defensoria Públika. Iha país balun, to’o ohin loron seidauk iha.
Ministru Justisa hatutan tán, “Estadu harii instituisaun Defensoria Públika, aleinde ne’e harii mós Prokuradoria Jerál Repúblika ho Tribunál. Importante tebes ba iha país demokrátiku ida ne’e, hodi fó asisténsia legál ba ita nia sidadaun sira iha Tribunál”.
