SEPFOPE sei implementa sistema Computer-Based Test iha fulan Novembru 2013
Sekretaria Estadu Polítika Formasaun Profisionál no Empregu (SEPFOPE), hamutuk Koreia-du-Sul hola tiha ona desizaun atu hahú iha Novembru 2013, muda sistema teste ba kandidatu servisu na’in sira, husi sistema PBT (Paper-Based Test) ba CBT (Computer-Based Test).
Atu hatene didi’ak kona-ba sistema foun ne’e, iha loron 5 fulan Jullu 2013, delegasaun husi Sekretaria Estadu Polítika Formasaun Profisionál no Empregu (SEPFOPE), liuhusi Diresaun Nasionál Empregu hamutuk ho Dezenvolvimentu Rekursu Umanu Koreia-du-Sul nian iha Timor-Leste, vizita Departamentu EPS (Employment Permit System), Jakarta. 
Objetivu husi vizita ne’e mak atu hatene kona-ba programa CBT (Computer Base Test) ne’ebé implementa ona iha nasaun viziñu ne’e. Tanba, Governu Koreia husu ona ba nasaun ne’ebé maka haruka servisu na’in sira atu ba servisu iha Koreia-du-Sul , tenke uza sistema online CBT.
Durante iha Jakarta, delegasaun hala’o enkontru ho Diretór Jerál EPS Indonézia Min Kyung Il ho nia funsiunáriu sira, hodi fahe esperiénsia kona-ba sistema rekrutamentu servisu na’in nian. Min Kyung Il hateten, “programa CBT iha Indonézia foin maka hahú iha tinan 2012. Molok ne’e, uza de’it sistema PBT hodi halo teste ba kandidatu trabalhadór sira”.
Xefe Gabinete SEPFOPE, Benigno Humberto da Cruz haktuir, “vizita ne’e importante tebes ba SEPFOPE no Koreia-du-Sul, tanba sai referénsia ba implementasaun CBT. Programa ne’e foun. Husi vizita ne’e, bele hetan ona esperiénsia husi maluk sira iha Indonézia”, nia deklara.
Delegasaun hosi SEPFOPE kompostu husi Xefe Gabinete SEPFOPE, Benigno da Cruz, Paulo Alves (Diretór Nasionál Empregu), Lucio Bere Tasi (Xefe Departamentu), Valêncio de Jesus (Xefe Employment Permit System SEPFOPE). Delegasaun Koreia ne’e kompostu husi Diretór Dezenvolvimentu Rekursu Umanu, Mr.Young no Xefe Mestre lian Koreia Dr. Lee.
Aleinde vizita EPS, delegasaun SEPFOPE mós vizita Balai Besar Pengembangan dan Perlindungan Tenaga Kerja Indonesia (fatin dezenvolvimentu no protesaun ba servisu na’in sira Indonesia nian no Sentru Kulturál Koreia nian iha Embaixada Repúblika Koreia-du-Sul).
