Governu Timor-Leste

Primeiru-Ministru Xanana Gusmão hetan konvite hodi halo “Reflesaun ida kona-ba Estadu Nasaun” nu’udar serimónia dahuluk ne’ebé dedika de’it ba tema ida ne’e, promove husi Parlamentu Nasionál iha loron 12 fulan Jullu.

Xanana Gusmão fó hanoin fali oinsá Estadu hahú “husi mamuk, laiha buat ida iha aspetu hotu-hotu, laiha esperiénsia iha estrutura governasaun nian, iha rekursu umanu no finanseiru sira, lei seidauk iha, seidauk iha esperiénsia ba moris iha demokrasia nian, laiha infraestrutura no hirak ne’ebé mak iha seidauk iha kbiit atu hadi’a hikas fali, falta instituisaun sira no laiha kapasidade atu hatan ba nesesidade país nian”.

Kontrusaun Estadu nu’udar prosesu ida defísil no tanba iha problema internu sira liuhosi kestaun polítika, ba ekonómika no sosiál, ne’ebé mak Estadu haka’as-an hodi hatutan konstrusaun sosiedade no Nasaun nian: rekonsiliasaun iha rai laran, edukasaun sívika sosiedade nian no mós obrigasaun sira Estadu nian ba povu no Nasaun.

Tuir Xanana Gusmão, konstrusaun Estadu liuhusi reforma instituisionál nian sira, hosi kresimentu ekonómiku, hosi dezenvolvimentu umanu no hosi relasaun internasionál sira.

Entre sira seluk, iha reforma instituisionál sira ne’ebé tama ba iha reforma importante sira iha setór defeza no seguransa nian, ne’ebé bele kapasita no profisionaliza Forsa Defeza no Polísia Nasionál. Iha reforma jestaun no administrasaun Estadu nian ne’ebé permite hodi dezenvolve setór públiku ida ne’ebé profisionál liu, kompetente no apartidáriu (lahali’is ba sorin-sorin), ho objetivu ba governasaun di’ak no transparénsia.

Kresimentu ekonómiku mak indikadór seluk ne’ebé favorese dezenvolvimentu nasionál, bainhira bazeia ba prinsípiu inkluzaun no ekuidade. Primeiru-Ministru aponta reforma fiskál, Pakote Referendu, programa sira dezentralizasaun nian, entre sira seluk, ne’eb’e aleinde dada atividade empreza nian sira fasilita mós investimentu emprezariál privadu, ne’ebé hanesan motor ekonomia nian, ne’ebé bele haburas rikusoin no kria empregu iha nasaun nia laran tomak no Estadu mós bele garante katak inflasaun sei lasa’e maka’as no sei bele kontrola. Estadu mós iha preokupasaun ba ekonomia ida ne’ebé mak ladepende de’it ba minarai maibé nia bele sai nu’udar motivasaun ida atuhodi diversifika setór tradisionál sira hanesan agrikultura, pekuária no peska hodi aumenta produtividade nasionál atubele to’o bá merkadu internasionál.

Fundu Infra-Estrutura nian, nune’e mós ba Planu Estratéjiku Dezenvolvimentu no mekanismu sira seluk, reflete ba investimentu atu hadi’a infra-estrutura bázika sira ne’ebé mak bele kontribui ba kualidade moris populsaun nian no ne’ebe permite ba dezenvolvimentu ne’ebe tama sektór hotu-hotu, inklui saúde no edukasaun, hodi liga ba kresimentu ekonómiku ba kresimentu ida ne’ebé la kotu.

“Objektivu prinsipál hosi Estadu Timoroan nian mak kontinua hadi’a kualidade moris timoroan sira nian no ninia dezenvolvimentu nu’udar ema.”.

Prova hosi ne’e mak, Fundu Dezenvolvimentu Kapitál Umanu mós, harii tiha atu hodi dezenvolve rekursu umanu  iha Timor-Leste no hanesan dezafiu atu atinji Objektivu Dezenvolvimentu Miléniu iha área  pobreza, nutrisaun ladi’ak, edukasaun, saúde, igualdade jéneru no konservasaun ambientál.

Entre sira seluk, ho hamenus taxa mortalidade ba labarik sira, aposta iha formasaun médiku no tékniku saúde sira nian, númeru aas husi labarik sira ne’ebé matríkula tiha ona nu’udar sasukat ba progresu iha área saúde no edukasaun nian. Hadi’a sistema judisiáriu no asesu jerál ba justisa, inklui hadi’a infraestrutura sira no reforsu kuadru legál, hatudu katak iha melloria maka’as iha área justisa nian.

Aspektu seluk ne’ebé importante iha konstrusaun Estadu Nasaun nian mak hanesan relasaun internasionál. Kona-ba sira hirak ne’e, Primeiru-Ministru    hatete “esforsu internu  ba konsolidasaun  iha ita nia instituisaun sira no iha ita nia ekonomia sira sei permite mós atu altera, imajen ne’ebé mak ita nia parseiru internasionál sira iha hosi ita nia país, hanesan ne’ebé mak akontese tiha ona” no “iha domíniu relasaun internasionál no multilaterál sira, Timor-Leste dezenvolve ona polítika  esterna ida ba viziñansa di’ak, respeitu ba soberania no integridade ba Nasaun sira no koopreasaun ho benefísiu ba parte rua ne’e hotu”.

Aleinde Primeiru-Ministru, líder parlementár sira husi bankada Frente Mudansa, Partidu Demokrátiku, CNRT no FRETILIN mós ko’alia. Sira ko’alia liubá iha área ne’ebé mak hanesan pilár sira dezenvolvimentu país nian, hodi reforsa katak “povu hakarak atu hadi’a nia kualidade moris nian”.