Governu Timor-Leste

Sekretaria Estadu Seguransa (SES) liuhusi Diresaun Jerál hala’o treinamentu kona-ba violensia domestika ba Profesór, PNTL, Pontu Fokál Prevensaun Konflitus Komunitária, Xefé suku, Xefé aldeia no estudante sira durante loron rua, 4 no 5 Jullu, iha sub-distritu Maubara Vila.
Tema husi treinamentu ne’e mak “Hamutuk Hasa’e Konsiensia hodi Kombate Violénsia Doméstika no Haburas Harmonizasaun iha Família no Sosiedade.”

Reprezentante Grupu Traballu Jeneru Sekretaria Estadu Seguransa, António Viegas, hateten, “Numéru violénsia doméstika bele reduz bainhira povu iha koñesimentu oinsá halo prevensaun”. Nia husu ba joventude sira ne’ebé mak tuir treinamentu, atu divulga informasaun no kuñesimentu ne’ebé hetan durante treinamentu, ba komunidade sira atu hatene di’ak liu tan oinsá atu preveni violénsia doméstika, liu-liu iha uma laran.

Iha fatin hanesan, Adjuntu Eskuadra PNTL Sub Distritu Maubara, Manuel Maria Fernandes, informa,  “Durante fulan Janeiru – inisiu Jullu 2013, PNTL Sub-Distritu Maubara simu ona keixa kazu violensia domestika hamutuk 14”. Oras-ne’e, PNTL Sub-Distritu Maubara prosesa hela kazu sira-ne’e, atui hato’o ba Tribunál hodi halo julgamentu no fó justisa ba vitima sira tuir Lei. “ Ne’e signifika Violénsia Doméstika iha Maubara a’as tebes, kompara ho Sub-Distritu sira seluk,” Adjuntu Manuel Maria Fernandes hateten.

Entertantu, Adjuntu Administradór sub-distritu Maubara, José Menezes Serão, sente orgullu, kongratula no kontente ho inisiativa di’ak husi Sekretária Estadu Seguransa hodi organiza treinamentu, fahe informasaun no aumenta koñesimentu, kona-bá violénsia doméstika ba joventude sub-distritu Maubara.

Nia husu Komisaun Organizadora husi Sekretária Estadu Seguransa, atu treinamentu sira iha futuru labele iha de’it sub-distritu, maibé to’o mós area rurál sira, tanba violénsia doméstika maioria akontese iha area rurais. Adjuntu mós informa, violénsia doméstika durante ne’e, la’os ba feto sira de’it maibé ko’alia liu ba jeneru. Katak feto ho mane bele identifika kauza hosi violénsia doméstika. Tanba violénsia doméstika maka hanesan, oan baku aman, inan aman baku oan, laen baku fen no bele mós fen baku laen. Nia husu atu juventude sira kuda domin iha fuan, hado’ok a’an husi violénsia, atu bele dezenvolve nasaun ba oin.