Governu Timor-Leste

Sekretaria Estadu Promosaun Igualdade (SEPI), servisu hamutuk ho Pusat Pelatihan Mandiri Kelautan Perikanan no Pertanian Indonézia, fó treinamentu ba Grupu Feto iha Suku Mehara, sub distritu Tutuala, distritu Lautem, kona-ba oinsá halo ananás ba jus ho marmelada durante loron tolu, hahú hosi loron 14 to’o 17, fulan Juñu, tinan 2013.

Júlio Canto, reprezenta Administradór Sub-Distritu Tutuala, ne’ebé loke treinamentu ne’e hatete, “treinamentu ne’e importante tébes ba maluk sira ne’ebé iha Mehara, tanba rai Mehara potensiál tébes liu-liu iha aifuan ananás ne’ebé tinan-tinan sempre fó fuan  barak. Bainhira faan mak ema la sosa, lori fali mai uma hodi fó han de’it fahi, tanbá ne’e presiza fó kapasitasaun ba grupu feto sira atu nune’e bele jere sira nia grupu ho didi’ak, hodi bele prodúz ananás ba jus, marmelada no rebusadu, hodi bele exporta mós ba rai li’ur”.

“Sekretaria Estadu Promosaun Igualdade la’ós implementadór ba programa ne’e, maibé suporta no fó ajuda de’it atu nune’e grupu ne’ebé forma hosi ita nia feto maluk sira bele la’o ho di’ak hodi nune’e bele ajuda ekonomia família iha uma laran”, hateten reprezentante SEPI, Henrique da Silva.

Iha fatin hanesan, Maria Gigi, responsável hosi Pusat Pelatihan Mandiri Kelautan Perikanan no Pertanian Indonézia, haktuir, “Timor-Leste nia produtu lokál barak, bainhira nia haree ema barak mak hemu produtu importasaun hanesan, sagiko ho delos nia sente triste, tanbá  Timor mós iha aifuan barak, maibé presiza ema ne’ebé matenek atu produz ai-fuan sira ba bebidas hanesan jus ka seluk tan. Husu ba partisipante sira atu bele tuir treinu ne’e halo didi’ak hodi ba futuru bele sai fali treinadór ba maluk sira seluk, nune’e bele prodúz ananás  ba jus, marmelada no seluk tan, nune’e bele esporta mós ba rai li’ur”.