Governu promove produtu lokál sira
Ministériu Komérsiu, Indústria no Ambiente (MKIA) halo lansamentu ofisiál, iha loron 13 no 14, fulan Juñu, kampãna ida hodi promove produtu lokál sira iha distritu Bobonaro no Kovalima.
Ministru Komérsiu, Indústria no Ambiente, António da Conceição, fó hatene katak liuhosi Despaxu N.º002/GM/MCIA/V/2013, Governu fixa valór ida ba produtu lokál sira. Purezemplu, batar fixa ho valór $0.65 ba Kg ida, fore-mungu ho $1.25 ba Kg, koto ho valór $3.50 ba Kg ida no hare-kulit ho valór $0.75 ba Kg ida. Produtu hirak ne’e mai hosi grupu kooperativa sira no komunidade.
António da Conceição, iha biban ida ne’e mós, husu ba grupu kooperativa sira, atu organiza-an iha grupu no komunidade tomak hodi servisu makaas atu nune’e, bele hetan produsaun ho kualidade di’ak.
“Husi produsaun hirak ne’ebé imi iha atu bele tama mós iha merkadu rai laran no ba merkadu Internasionál. Maibé, grupu kooperativa sira ne’e tenke prenxe kritériu no iha lisensa legál”, konklui Ministru Komérsiu, Indústria no Ambiente.
