Governu Timor-Leste

MInistériu Agrikultura no Pezka ho Sekretaria Estadu Polítika Formasaun Profisionál no Empregu (SEPFOPE), iha loron 21 fulan Juñu, haruka formandu hamutuk na’in 20, kompostu hosi feto na’in 3 no mane na’in 17 hosi subdistritu Lospalos distritu Lautem, ba tuir treinamentu pekuária nian kona-ba hois karau nia susubeen, iha Batu-Malang, Indonézia, durante fulan ida, hahú husi loron 22 fulan Maiu to’o loron 19 fulan Jullu tinan 2013.

Iha serimónia despedida, Ministru Agrikultura no Peska, Mariano Assanami Sabino haktuir”, ba alin sira ne’ebé mak atu ba tuir formasaun iha Indonézia, Minisériu haree katak treinamentu ne’e atu hasa’e ita-nia koñesimentu no kapasidade para bele aselera liu ita-nia dezenvolvimentu iha rai-laran ne’ebé mak importante tebetebes.  Ba imi na’in hira ne’ebé mak atu ba Indonézia ne’e, hanesan reprezenta joven lubuk ida, reprezenta nasaun, ba atu aprende tanba ne’e mak imi tenke uza oportunidade ne’e hodi aprende didi’ak no hakle’an imi nia koñesimentu nune’e mai bele aplika iha ita nia rai”.

Sekretáriu Estadu Polítika Formasaun Profisionál no Empregu, Ilídio Ximenes da Costa esplika katak, “programa kapasita rekursu umanu ida ne’e integradu, entre ministériu ida ne’ebé mak relevante, iha parte SEPFOPE nian mak halo formasaun, parte MAP nian haree liu ba produsaun”.

Sekretáriu Estadu haktuir tan, “fó hatene ba formandu sira katak, ami sei ko’alia ho embaixadór Indonézia iha Timor-Leste, atu haruka formadór na’in rua hosi Malang mai hodi akompaña nafatin imi iha imi nia prátika iha terrenu, hodi halo avaliasaun kona-ba imi nia aproveitamentu. Bainhira imi nia avaliasuaun di’ak, ida ne’e imi mós sai hanesan ezemplu ba distritu sira seluk” tenik Ilídio.

Reprezentante Embaixada Indonézia nian iha Timor-Leste, Mahendra, konsidera pozitivu tebes ba programa kapasitasaun rekursu umanu Timor-Leste nian ida ne’e, ne’ebé mak Governu rasik mak fó apoiu finanseiru ba nia dezenvolvimentu. “Ami hakarak atu ami nia formandu sira aprende téknika hois karau susubeen nian no atu sira bele hetan esperiénsia di’ak ida husi troka koñesimentu iha Indonézia”, tenik Embaixadór Indonézia.