Governu Timor-Leste

Sekretária Estadu ba Promosaun Igualdade, Idelta Maria Rodrigues, servisu hamutuk ho Ministériu Edukasaun hala’o sorumutu ho Grupu Traballu Igualdade Jéneru Nivél Nasionál no Distritál nian, iha Salaun Ministériu Edukasaun, Vila-Verde, Díli, loron 25, fulan Juñu.

Sekretária Estadu ba Promosaun Igualdade, Idelta Maria Rodrigues, iha nia diskursu hatete, “tuir rezolusaun hosi Governu, prevee harii no implementa mekanizmu ida iha Ministériu no Sekretária Estadu ida-idak nia laran, hodi garante integrasaun perspetiva jéneru iha dezenvolvimentu  ba polítika no estratéjia iha liña Ministeriál nia laran. Iha mekanizmu ne’e, identifika ona pontu fokál ba jéneru iha Ministériu no harii grupu interministeriál hosi pontu fokál jéneru sira, ne’ebé koordena husi Sekretaria Estadu ba Promosaun Igualdade, hodi garante kolaborasaun ne’ebé efikás no integrasaun jéneru iha atividade tomak Governu nian. Ha’u hakarak hato’o ha’u nia agradesimentu no apresiasaun ba Ministériu Edukasaun, tanba hafoin Governu Konstitusionál V harii, ha’u hala’o vizita ba dahuluk mai iha Ministériu Edukasaun. Polítika Governu Konstitusionál IV, diferensa uitoan, tanba ne’e, ohin ha’u rasik  mai vizita hodi ko’alia kona-ba oinsá mak bele implementa polítika abordajen integradu ba jéneru no ninia orsamentu ba implementasaun planu asaun nasionál bazeia ba jéneru, implementasaun Lei Kontra Violénsia no iha programa prioridade barak ne’ebé Ministériu tenke hatene, oinsá mak ita hotu bele hatene kona-ba polítika igualdade jéneru iha Timor-Leste.

Iha fatin hanesan, Vise-Ministra Ensinu Báziku, Dulce de Jesus Soares hateten, “Ida ne’e hanesan programa Governu Konstitusionál V nian atu hodi kontinua reforsa programa ne’ebé mak Governu Konstitusionál IV hala’o tiha ona iha área igualdade jéneru nian. Ida ne’e importante tébes hodi bele reforsa liu tán funsionáriu, Diretór, Xefe departamentu sira nia koñesimntu kona-ba área igualdade jéneru”, esplika Dulce de Jesus Soares.