Timor-Leste ho Indonézia asina MoU kona-ba pasajen fronteira
Timor-Leste ho Indonézia konkorda atu loke tan pontu entrada ho utilizasaun pasajen fronteira iha área tolu, hanesan: Memo-Builalo (Maliana), inklui Tunu Bibi, Pasabe-Haumenanan (Oe-Cusse Ambeno) no Hakesak Turiskai-Indonézia.
Konkordánsia ne’e mosu liuhosi asina akordu Memorandum of Understanding (MoU) entre Ministru Negósiu Estranjéiru no Kooperasaun Timor-Leste nian, José Luís Guterres ho nia omólogo Marty Natalegawa, ne’ebé asiste direta hosi Prezidénte Repúblika Timor-Leste, Taur Matan Ruak no Prezidénte Repúblika Indonézia Susilo Bambang Yodoyono, iha Pálasiu Prezidénte Repúblika nian iha Jakarta, loron 21 fulan Juñu.
Objetivu hosi akordu ne’e, atu ajuda populasaun nasaun rua nian ne’ebé hela iha área tolu ne’e, bele hala’o sira nia atividade livre no bele uza de’it Pasajen Fronteira nian.
Aleinde ne’e, Ministru na’in rua ne’e mós asina akordu ida hodi fasilita sidadaun Timor-Leste no Indonézia ne’ebé uza Pasaporte Diplomata no Servisu, atu tama sai sei laiha akuzasaun vistu bainhira liuhosi Pontu Entrada Internasionál sira.
Akordu seluk ne’ebé asina durante vizita Prezidente Repúblika Taur Matan Ruak mak akordu kona-ba komitmentu rai rua atu finaliza demarkasaun fronteira iha tempu badak.
