Saúde Vise Primeiru-Ministru Fernando La Sama de Araújo rekupera fali ona
Saúde Vise Primeiru-Ministru, Fernando La Sama de Araújo, rekupera hikas, hafoin halo última operasaun ba ninia pulmaun ne’ebé la’o ho di’ak no susesu, iha loron 17 fulan Juñu tinan 2013, iha ospitál Mount Elisabeth, Singapura.
“Operasaun hala’o durante oras haat nia laran, hahú hosi tuku 09h00 to’o tuku13h00 oras Singapura nian. Iha operasaun ne’e troka ho susesu klep fuan nian ho orgaun isin ne’ebé hanesan ho isin Vise Primeiru-Ministru nian”,informa Xefe Gabinete Vise Primeiru-Ministru.
Vise Primeiru-Ministru, Fernando La Sama, agora dadaun iha kondisaun ne’ebé di’ak, no kontinua hetan atensaun máxima hosi ekipa médika sira iha ospitál refere.
La Sama, hahú hala’o tratamentu iha Ospitál Nasionál Guido Valadares iha loron 30 Maiu 2013 tanba moras fuan. Hafoin loron rua hala’o tratamentu iha ospitál ne’e, ekipa médika hosi ospitál rekomenda atu kontinua hala’o tratamentu iha ospitál Royal, Bali-Indonézia. Hafoin semana ida iha ospitál ne’ebá Lasama hetan fali rekomendasaun hodi kontinua hala’o tratamentu iha Ospitál Mount Elisabeth, Singapura, to’o rekopera fali ninia saúde.
