Governu Timor-Leste

Iha loron 7 fulan Juñu 2013, Ministru Administrasaun Estatal,  Jorge da Conceição Teme asina nota entendimentu ho reprezentante hosi The Asia Fundation, Dra. Susan Marx Country kona-ba peskiza ba prestasaun servisu hosi Konsellu Suku sira, iha salaun enkontru Ministériu Administrasaun Estatal, Caicoli-Dili.

Objetivu hosi akordu ida ne’e atu Asia Fundation ajuda  Ministériu Administrasaun  Estatál halibur informasaun kona-ba funsionamentu Konsellu Suku durante mandatu governasaun ida ne’e nian no kona-ba relasionamentu no  impaktu iha  komunidade sira, atu nune’e bele ajusta  kuadru normativu   hosi estrutura lideransa komunitária sira-nia aspirasaun ba komunidade sira no ba prosesu desentralizasaun.

Ministru Administrasaun Estatal subliña liután katak, “akordu ida ne’e atu kontinua de’it ho projetu ne’ebé implementa tiha ona maibé presiza kontinua hadi’a liután atu nune’e bele fó benefísiu ba nasaun no povu ida ne’e, liu-liu lider komunitáriu sira kona-ba sira-nia prespetiva, sira-nia hanoin, sira-nia kontribuisaun no sira-nia obrigasaun ba dezenvolvimentu”.

Partisipa iha serimónia ne’e Ministru Administrasaun Estatal, Jorge da Conceição Teme, Sekertáriu Estadu Desentalizasaun Administrativa, Tomás Cabral, Reprezentante hosi The Asia Fundation, Susan Marx Country,  Diretór-Jerál, Nasionál, no mós Asesór nasionál no internasionál sira.