Governu Timor-Leste

Iha loron 5 fulan Juñu, iha Ministeriu Negósio Estrangeiru no Kooperasaun, Inspesaun Jerál Estadu (IJE), no Pusat Pendidikan dan Pengembangan Audit & Manajemen Yayasan Pendidikan Internal Audit (PPAM-YPIA), asina nota entendimentu.

Inspetόr Jerál Estadu,  Fransisco Carvalho, hatete, “nota entendimentu ida ne’e, atu formaliza tiha akordu no kooperasaun ne’ebe hala’o ona iha tinan kotuk liu ba, ho objetivu atu bele kontinua hala’o formasaun no treinamentu kona-ba auditoria interna ba funsionáriu tékniku nian sira iha Inspesaun Jerál Estadu nomós Inspesaun Jerál iha liña Ministeriál nian sira. Atu dehan de’it katak implementasaun Memorandum Entendimentu ida ne’e, laós ba de’it funsionáriu sira iha Inspesaun Jerál Estadu nian, maibé sei abranje mós ba iha Inspesaun Jerál iha liña ministeriál nian sira, hodi ba tuir formasaun no treinamentu kona-ba auditoria interna, no mós bele abranje ba órgaun sira seluk wanhira presiza”.

Francisco Carvalho esplika tan: “Tuir padraun internasionál nian, molok funsionáriu ida atu hala’o nia kna’ar nu’udar auditor, presiza hetan uluk formasaun no treinamentu espesífiku iha auditoria, nune’e bele sai hanesan auditor ou auditoria ne’ebé formadu”.

Iha fatin hanesan, Prezidente PPAM-YPIA, Ridwan Fatarudin, hatete nia mós rekoñese katak, durante servisu hamutuk institutu ida ne’e fó treinamentu ba funsionáriu IJE no inspetόr jerál hamutuk 210, “pesoál sira ne’e tuir treinamentu ho di’ak duni tanba sira bele liu iha teste hodi hetan sertifikadu”.

Seremónia ne’e hetan partisipasaun hosi, Vice-Ministru Negósiu Estrangeriu no Kooperasaun, Constâncio Pinto, Sekretariu Estadu Konsellu Ministru, Avelino Coelho, Inspetor Jerál Estadu, Fransisco Carvalho, Prezidente YPIA no nia direjente sira, membru Governu sira, deputadu sira, no korpu diplomátiku sira.