Konferénsia Internasionál Desentralizasaun Administrativa no Poder Lokál
Governu Timor-Leste liu hosi Sekretaria Estadu Desentralizasaun Administrativa, Ministériu Administrasaun Estatal no Komisaun A Parlamentu Nasionál hala’o konferénsia internasionál ida hodi debate kona-ba Desentralizasaun Administrativa no Poder Lokál ne’ebé hala’o iha loron 28 to’o loron 29 fulan Maiu 2013, iha Sentru Konvensaun Dili.
Primeiru-Ministru, Xanana Gusmão iha ninia diskursu hateten katak “Planu Estratéjiku Dezenvolvimentu 2011-2030 iha vizaun ida ne’ebé klara ba Timor-Leste. Loke no halo dalan naruk ne’ebé sei transforma ita iha tinan 20 nia laran sai nasaun ida ho rendimentu médiu-altu, ho sosiedade ne’ebé moris di’ak liu, sosial no politikamente estável, instruída no saudável. Ita hakarak atu reduz pobreza, liuhusi diversifikasaun ekonomia ho kapasitasaun ba ita-nia profisionál sira transforma Timor-Leste nia perfil ka ilas, no tranformasaun ida ne’e bele bá to’o iha Suku, Aldeia no família ida-idak.”
“Se desentralizasaun sei posibilita Estadu atu hakbesik-aan liután ba timoroan sira, ne’e fundamental reflesaun kona-ba oinsá no bainhira. Ita hatene katak se ita-nia objetivu mak efikásia aparellu governativu nian, entaun modelu ne’ebé ita adopta tenke funsioál no labele defisil ka burokrátiku demais. Tenke evita duplikasaun sira entre Governu lokál ho Governu nasionál, hodi obriga fronteiras klaras entre responsabilidade ho kompeténsia sira hosi parte ida-idak nian”.
Xanana Gusmão mós subliña liután katak, “Ita tenke buka hetan modelu poder lokál ne’ebé di’ak, tenke kompatível ho ita-nia tradisaun komunitária sira, tanba sira mak sei sai hanesan baze esensiál iha ita-nia konvivénsia hanesan Nasaun”.
Iha fatin hanesan, Ministru Administrasaun Estatal, Jorge da Conceição Teme, hateten katak, “desentralizasaun iha objetivu fundamentál atu hakbesik Governu ba komunidade sira iha kada distritu no kada aldeia atu delega lider lokál sira-nia kapacidade atu foti desizaun lori sira-nia komunidade no sidadaun nia naran”.
Tuir Ministru Jorge Teme katak, “Aprosimasaun ida ne’e nesesária ba nasaun ida hanesan ita-nian ne’ebé iha defikuldade maka’as iha komunikasaun no interasaun ho Governu iha ita-nia jeografia, liu-liu ba komunidade sira iha área rural sira”.
Marka prezensa iha konferénsia ne’e Primeiru-Ministru, Kay Rala Xanana Gusmão no membru Governu sira, Prezidente Parlamentu Nasionál, Vicente Guterres, Vise Prezidente Parlamentu Nasional, Adriano do Nascimento no membru parlamentu sira, Primeira-Dama, Isabel Ferreira, komitiva hosi Institutu Siénsias Sosiál no Polítika hosi Universidade Téknika Lisboa nian, komitiva hosi Portugal, komitiva hosi Governu Lokál Viktoria, Austrália, komitiva hosi Indonézia, Diretór Jerál no Nasionál sira, funsionáriu no estudante sira no mós sosiedade sivil sira.
