Governu Timor-Leste

Iha loron 31 fulan Maiu, Prezidente Komisaun Funsaun Públika, Libório Pereira, akompaña hosi Ministru Administrasaun Estatál, Jorge da Conceição Teme, fó pose ba kargu xefia Ministériu Administrasaun Estatál nian, iha Dili.

Ministru Administrasaun Estatál, Jorge da Conceição Teme, iha ninia diskursu hateten “Prioridade V Governu Konstitusionál nian ida iha tinan ida ne’e mak atu hadi’a uma laran, tanba prioridade ida ne’e mak, Ministériu Administrasaun Estatál, ohin hala’o  serimónia fó posse ba kargu diresaun xefia sira, hodi fó konfiansa ba sira atu bele halo servisu hanesan líder hodi halo transformasaun iha ministériu laran hodi kontribui atu halo  servisu sira ho  efisiénsia no efikásia”.

Iha fatin hanesan, Prezidente Komisaun Funsaun Públika, Libório Pereira hateten, “nu’udar xefe ka líder iha responsabilidade  atu lori solusaun mai ministériu no la’os lori polémika ka problema. Natureza nomeasaun iha kondisaun serbisu, iha natureza tranzitória ne’ebé ita bele dehan tinan rua, maibé bele fulan rua de’it, tanba ne’e kargu diresaun no xefia ezije responsabilidade atu bele tulun membru Governu sira sein esepsaun, la haree ba diretór nia kor partidu ka grupu ne’ebé, tantu izensaun, neutralidade no imparsialidade diretór sira-nian  importante”.

Marka prezensa iha serimónia ne’e, Ministru Administrasaun Estatál, Jorge da Conceição Teme, Sekretáriu Estadu Desentralizasaun Administrativa, Tomás Cabral, Sekretáriu Estadu Dezenvolvimentu Lokál, Samuel Mendonça, Prezidente Komisaun Funsaun Públika, Libório Pereira no komisaríu sira, Diretór Jerál, Diretór Nasionál no mós Xefe Departamentu sira hosi Ministériu Administrasaun Estatál nian.