“Papél Forsa Seguransa nian iha Respeitu ba Liberdade Asosiasaun”
Sekretaria Estadu ba Polítika Formasaun Profisionál no Empregu (SEFOPE) no Organizasaun Internasionál Traballu nian (OIT) organiza formasaun ida durante loron tolu – husi loron 3 to’o loron 5 fulan Juñu kona-ba “Papél Forsa Seguransa nian iha Respeitu ba Liberdade Asosiasaun nian”. Asaun ne’ebé hala’o iha Delta Nova, Dili, ne’e destina ba partisipante maizumenus na’in 50, mai husi ajente sira Polísia Nasionál Timor-Leste (PNTL) nian sira, reprezentante sira husi sindikadu sira, husi empregadór sira no funsionáriu sira SEFOPE nian.
Iha abertura, Sekretáriu Estadu ba Polítika Formasaun Profisionál no Empregu, Ilídiu Ximenes da Costa, ko’alia kona-ba importánsia husi liberdade atu halo sorumutu no manifestasaun (ne’ebé rezulta husi liberdade asosiasaun nian) no direitu atu halo greve, nu’udar pilár esensiál sira ba funsionamentu demokrasia no Estadu Direitu.
Partisipante sira simu Lei n.u 2/2006, loron 8 fulan Fevereiru, iha versaun lian Tetun nian, kona-ba liberdade atu halo sorumutu no manifestasaun no Lei n.u 5/2012, loron 29 fulan Fevereiru, kona-ba direitu atu halo greve, nune’e mós ho manuál ne’ebé fo esplikasaun kona-ba lei rua ne’e. Iha manual ne’e realsa mós buat seluk, hanesan kona-ba knaar no importánsia forsa seguransa nian iha manutensaun pás nian no iha garantia direitu fundamentál sira sidadaun nian. Aleinde legizlasaun interna, partisipante sira mós simu formasaun kona-ba instrumentu prinsipál no tratadu internasionál sira ne’ebé vigora kona-ba liberdade atu halo sorumutu no manifestasaun no direitu atu halo greve.
Asaun formasaun ida ne’e serve mós atu reforsa lasu institusionál sira ne’ebé iha entre OIT no SEFOPE ne’ebé partisipa, ho delegasaun ofisiál reprezentasaun tripartida, iha Konferénsia Internasionál da-102, ne’ebé hala’o iha Jenebra husi loron 5 to’o loron 20 fulan Juñu. Konferénsia anuál ida ne’e atu promove diálogu sosiál iha nivel globál no aborda aspetu prinsipál sira ne’ebé afeta ba merkadu servisu nian ohin loron, liuliu, taxa dezempregu nian ne’ebé aas, redusaun rendimentu traballadór sira nian, falta situasaun servisu ne’ebé aumenta, ne’ebé prodús efeitu hirak ne’ebé la di’ak iha kualidade moris nian no iha direitu hirak ne’ebé mak traballadór sira nian.
