Konsellu Jestaun Dixiplina no Advokasia Timor-Leste asina akordu kooperasaun ho Orden Advogadu Cabo-Verde nian
Ministériu Justisa liuhosi Prezidente Konsellu Jestaun Dixiplina no Advokasia (KJDA), Dr.Nelinho Vital, asina akordu kooperasaun ho Bostanária Orden Advogadu Cabo-Verde, Dra.Leida Helena Maurício dos Santos, iha loron 26, fulan Maiu, tinan 2013, fatin Sidade Praia Kabo-Verde.
Hafoin asina akordu, Prezidente KJDA, Nelinho Vital, informa, “objetivu hosi asina akordu ne’e atu hametin lasu kooperasaun entre instituisaun advogadu nasaun rua nian nu’udar aktu ida importante ba dezenvolvimentu Konsellu Jestaun Dixiplina no Advokasia no mós hanesan embriaun hosi orden advogadu Timor-Leste nian iha futuru”.
Nelinho esplika liután, “ tuir akordu ne’e Orden Advogadu Cabo-Verde (OACV), sei haruka informasaun nesesáriu tuir pedidu KJDA nian, liuliu kona-ba advogadu Caboverdianu, ne’ebé hakarak ezerse funsaun advokasia nian iha Timor-Leste, tanba tuir Lei No.11/2008 alteradu ho Lei No.1/2013, fó dalan ba advogadu estranjeiru sira atu hala’o kna’ar advogadu nian iha Timor-Leste”.
Iha fatin hanesan, Dra.Leida Helena Maurício dos Santos, informa mós “ hosi akordu ne’e sei sai hanesan instrumentu ida hodi loke dalan ba kooperasaun di’ak entre OACV ho KJDA ne’ebé foin asina daudaun ne’e. Orden Advogadu Cabo-Verde nian mós prontu atu tulun Konsellu Jestaun Dixiplina no Advokasia Timor-Leste nian iha tempu oin mai, tanba hanesan ema profesionál ne’ebé ho dignidade (Officium Nobile) sira sei halibur malu iha instituisaun Orden Advogadu nian sira, atu nune’e sira bele hala’o funsaun ho di’ak hodi defende direitu ema nian, ne’ebé buka lia loos iha justisa no mós sai defensór ba demokrasia”.
