Sensebilizasaun Komunitáriu “Livre Husi Lixu”
Iha ámbitu komemorasaun, loron Restaurasaun Independénsia Timor-Leste ba dala 11, iha loron 20 fulan Maiu 2013, Ministru Administrasaun Estatal, Jorge da Conceição Teme organiza programa sensebilizasaun komunitária “Livre husi Lixu”, iha bairu-Delta2 - Comoro, Dili.
Iha sesaun abertura, Prezidente Repúblika, Taur Matan Ruak felisita komunidade sira iha bairu-Delta2 tanba bairu refere bele sai referénsia ba ita-nia nasaun.
”Ha’u-nia parabéns ba Bairu-Delta2 tanba bele sai referénsia ba ita-nia nasaun. Parabéns ba imi tanba ne’e importante tebes no karik fatin hotu-hotu la konsege halo ida ne’e”. Xefe Estadu mós ko’alia kona-ba problema seguransa, “segurança importante, se ita-boot sira haree, ba ha’u seguransa maka prioridade. Seguransa fó hakmatek ba ema, fó sosegu, fó kalma, fó paz para nia hanoin nia vida, hanoin futuru, hanoin oan sira-nia eskola, harii ita-nia vida, ita-nia uma kain, harii ita-nia nasaun; sira ne’e hotu importante maibé só bele la’o se iha seguransa”.
Tuir Ministru Administrasaun Estatal, Jorge da Conceição Teme, “objetivu hosi programa sensibilizasaun ida ne’e, atu sensibiliza komunidade sira oinsá moris hanesan sidadaun ida iha sidade, ne’ebé hahú hosi área Delta Comoro, liu-liu iha Delta2, nune’e ami-nia servisu hamutuk ho xefe bairu sira, xefe aldeia sira, xefe suku sira, administradór subdistritu no distritu sira, atu bele hala’o to’o ba baze”.
Marka prezensa iha serimónia, Prezidente Repúblika, Taur matan Ruak, Primeira-Dama, Isabel Ferreira, Ministru Administrasaun Estatal, Jorge da Conceição Teme, Sekretáriu Estadu Meiu Ambiente, Nominando Soares Martins, Sekretariu Estadu Joventude Desportu, Miguel Marques Manetelo, Reprezentante Polísia Nasionál Timor-Leste, Administradór distritu Dili, Gaspar Soares, Administradór subdistritu Dili, Xefe suku Comoro no Cefe aldeia Fomentu.
